Óńdeýshi saladaǵy ınvestıtsııalar tómendegen joq - Á. Isekeshev
ASTANA. QazAqparat - Óńdeýshi saladaǵy ınvestıtsııalar tómendegen joq. Bul týraly búgin Astanada QR Investıtsııalar jáne damý mınıstri Áset Isekeshev málim etti.
«Álemdegi daǵdarys saldarynan 2014 jyly ınvestıtsııanyń tómendeýin baıqadyq. Taldaý derekterine súıensek, ınvestıtsııalar munaı-gaz jáne taý-ken sektorlaryna tómendedi. Al óńdeýshi saladaǵy ınvestıtsııa kólemi óziniń deńgeıin saqtap qaldy», - dedi Á. Isekeshev.
Osy oraıda mınıstr daǵdarysqa qaramastan, ındýstrıaldyq baǵdarlama óńdeýshi salaǵa oń áser etkenin atap ótti.
Budan buryn habarlanǵandaı, búgin Áset Isekeshev Astanada bıyl qyzmetin bastaǵan HQKO janyndaǵy Investorlarǵa qyzmet kórsetý bóliminiń jumysymen tanysty.
QR IDM málimetine qaraǵanda, Qazaqstanda ınvestorlarǵa qyzmet kórsetetin 19 bólim jumys isteıdi, ıaǵnı Astanada - 2, Almatyda - 3, al ár oblys ortalyǵynda bir qyzmet kórsetý sektory bolady. Bul bólimsheler ınvestorlarǵa bıýrokratııalyq jáne ákimshilik salmaqty aıtarlyqtaı tómendetedi dep kútilýde. Investorlarǵa qyzmet kórsetý bólimderinde ınvestıtsııalyq jobany júzege asyrýǵa barlyq qajetti memlekettik qyzmetti «bir tereze» qaǵıdaty arqyly alýǵa bolady.
