Óńdeýshi ónerkásip óniminiń eksporty 18,6 paıyzǵa tómendedi

NUR-SULTAN. QazAqparat - 2020 jyldyń І-jartyjyldyǵynda óńdeý ónerkásibiniń ósimi 4,8 paıyzdy qurady. Bul týraly QR Indýstrııa jáne ınfraqurylymdyq damý vıtse-mınıstri Amanııaz Erjanov aıtty, dep habarlaıdy QazAqparat tilshisi.

«Osy jyldyń basynan bastap úshinshi ındýstrııalandyrý baǵdarlamasyn iske asyrylýda. Memleket basshysynyń tapsyrmasy boıynsha atalǵan baǵdarlamanyń negizgi maqsaty ishki jáne syrtqy naryqtarda básekege qabiletti óńdeýshi ónerkásip bolyp belgilendi. Basymdyq orta jáne joǵary tehnologııalyq kúrdeli ónim shyǵarýǵa qaýqarly, sondaı-aq eksportqa baǵyttalǵan kásiporyndarǵa jasaldy. Osy jyldyń birinshi jartyjyldyǵynyń qorytyndysy boıynsha óńdeý ónerkásibiniń ósimi 4,8 paıyzdy qurady», - dedi vıtse-mınıstr.

Onyń atap ótýinshe, óńdeý ónerkásibiniń negizgi kapıtalyna salynǵan ınvestıtsııalar kólemi ótken jyldyń sáıkes kezeńimen salystyrǵanda 6,1 paıyzǵa ulǵaıyp, 373 mlrd teńgege jetti.

«Álemdi jaılaǵan indetke baılanysty halyqaralyq saýdadaǵy shekteýlerdiń saaldarynan óńdeýshi ónerkásip óniminiń eksporty osy jyldyń qańtar-mamyrynda 18,6 paıyzǵa azaıyp, 5,2 mlrd AQSh dollaryn qurady.

»Sonymen qatar 1-toqsannyń qorytyndysy boıynsha sektorda jumyspen qamtylǵandar sany 601,4 myń adamdy qurap, ótken jyldyń tıisti kezeńimen salystyrǵanda 1,4 paıyzǵa artty. 2020 jylǵy 1 shildedegi jaǵdaı boıynsha óńdeýshi ónerkásip salasynda 16,4 myń kásiporyn jumys isteıdi. Indýstrııalandyrý baǵdarlamasy aıasynda jyl basynan beri jalpy somasy 87,4 mlrd teńgege memlekettik qoldaý sharalary usynyldy«, - dedi ol.