Óńdeýshi kásiporyndarǵa 3 paıyzdyq jeńildetilgen nesıe beriledi - UEM
«Karantınniń shekteý sharalarynyń jeńildeýi aıasynda, mamyrdan bastap qyzmetter sektory boıynsha jekelegen salalardyń qalpyna kelýi baıqalady. Atap aıtqanda, saýda 28,3%-ǵa, onyń ishinde bólshek saýda – 34,2%-ǵa, kóterme saýda – 26,1%-ǵa ósti. Kólik qyzmetteri – 20,7%-ǵa, onyń ishinde jolaýshylar aınalymy – 41,5%-ǵa, júk aınalymy – 5,7%-ǵa artty. Al tamaqtaný boıynsha qyzmetter 10,8%-ǵa ósti», - dedi Rýslan Dálenov Úkimet otyrysynda.
Mamyr aıynda qyzmetter salasynda ósimniń serpindi qalpyna kelýi tirkelgen.
«Ekonomıkalyq belsendilikti odan ári qalpyna keltirý maqsatynda 20 mamyrda 2020 jylǵa arnalǵan keshendi jospar qabyldandy. Keshendi jospar qoldanbaly sıpattaǵy naqty sharalardy qamtıdy. Bul aldymen - ónerkásipti damytý qoryn qurý. Óńdeýshi kásiporyndarǵa 3% jeńildetilgen mólshermen nesıe berý kózdelip otyr», - dedi ol.
