Óńdeý salasyndaǵy 7 paıyzdyq nesıe stavkasyn áli de tómendetý qajet - S.Ahmetov
ASTANA. 19 jeltoqsan. QazAqparat - Óńdeý salasyndaǵy 7 paıyzdyq nesıe stavkasyn áli de tómendetý qajet. Búgin Úkimet otyrysynda QR Premer-Mınıstri Serik Ahmetov osylaı dedi.
Aýyl sharýashylyǵy taýarlaryn qaıta óńdeý máselesi jyl boıy barlyq múddeli memlekettik organdar tarabynan keńinen talqyǵa túskenin atap ótken Úkimet basshysy: «Degenmen, men Aýyl sharýashylyǵy mınıstrliginiń, Ekonomıka mınıstrliginiń (Ekonomıka jáne bıýdjettik josparlaý mınıstrligi), barsha qarjy-ekonomıkalyq bloktyń, qarjy sektorlarynyń, bizdiń damý ınstıtýttarynyń nazaryn myna jaıtqa aýdarǵym keledi. Aýyl sharýashylyǵy taýarlaryn qaıta óńdeýdi nesıeleýde biz stavkany 7 paıyzǵa deıin aıqyndadyq. Taǵy da atap ótkim keledi, qaıta óńdeý úshin bul áli de bolsa joǵary deńgeıli paıyzdyq stavka. Bank sektory naryǵynda bul 12-13 paıyz ekendigi túsinikti. Biraq, qaıta óńdeý salasy, ıaǵnı mashına jasaý men qaıta óńdeý úshin 7 paıyzdy tómendetý kerek», - dedi.
Sonymen qatar S.Ahmetov jyl saıyn paıyzdyq stavkany tómendetýge Úkimet qol jetkizip otyratyndyǵyn basa aıtty. Óıtkeni, Úkimet basshysynyń paıymynsha, nesıeniń paıyzdyq stavkasyn tómendetý bul salaǵa otandyq ári sheteldik ınvestorlardy tartýda yntalandyrýshy tetik bolyp tabylady.
