Óńdeý ónerkásibiniń jalpy ishki ónimdegi úlesi 14 paıyzǵa jýyqtady

NUR-SULTAN. QazAqparat – Ótken jyldyń qorytyndysy boıynsha elimizde óńdeý ónerkásibiniń úlesi 2,3 paıyzǵa artyp, 13,7% qurady. Bul týraly QR Premer-Mınıstriniń orynbasary-QR Saýda jáne ıntegratsııa mınıstri Baqyt Sultanov Bishkekte málim etti, dep habarlaıdy QazAqparat tilshisi.

«Eń aldymen, atalǵan sharany uıymdastyrýshy qyrǵyz baýyrymyzǵa jáne Eýrazııalyq ekonomıkalyq komıssııaǵa alǵysymdy bildiremin. Búgingi talqylaý aldaǵy ýaqytta «eýrazııashyldyq» ıdeıasyn nyǵaıta túsýge negiz bolady dep senemin. Qazaqstan Úkimetiniń basym mindeti - óńdelgen ónim óndirisin arttyrý, oqshaýlandyrý kólemin ulǵaıtý, qosylǵan qunnyń jańa tizbekterin qurý jáne ekonomıkany ártaraptandyrý. Sondaı-aq, ındýstrııalandyrýdyń úshinshi besjyldyǵy aıasynda ishki jáne syrtqy naryqta óńdeý ónerkásibiniń básekege qabiletin arttyrý maqsaty qoıyldy», - dedi Eýrazııa ekonomıkalyq forýmyna beınebaılanys arqyly qatysqan Baqyt Sultanov.

Úkimet basshysy orynbasarynyń aıtýynsha, óńdeý ónerkásibi salalaryn tehnologııalyq damytý jáne tsıfrlandyrý, ortasha jáne joǵary tehnologııalyq óndiriletin taýarlar nomenklatýrasyn keńeıtý, bazalyq óndiristerdi damytý jáne strategııalyq jobalardy iske asyrý arqyly júzege aspaq.

«Sońǵy 2 jyldyń ishinde oń kórsetkishke qol jetkizdik. 2021 jyly óńdeý ónerkásibiniń úlesi JІÓ qurylymynda 2018 jylmen salystyrǵanda 2,3 paıyzǵa artyp, 13,7% qurady. Óńdeýshi sektordyń jalpy qosylǵan quny 2018 jylmen salystyrǵanda ótken jyly 53% -ǵa artyp, 10,8 trln teńgege jetti. Sonymen qatar ótken jyly «Ónerkásip saıasaty týraly» zań qabyldandy. Onda ekonomıkanyń naqty sektoryn damytýdyń jańa tásilderi bekitildi», - deıdi ol.

B. Sultanov keltirgen málimette aıtylǵandaı, ónerkásip saıasaty týraly zańdy qabyldaýdyń nátıjesinde ishki naryqty sapaly ónimmen qamtyp, eksportqa baǵdarlanǵan tıimdi kásiporyndarǵa basa nazar aýdaryldy.

Sonymen qatar, jańa zań arqyly memlekettik qoldaýdy keshendi yntalandyrý júıesine kóshirý jáne salalyq basymdyqtan bas tarta otyryp, naqty taýarlardy óndirýge mán berý kózdelgen.

Buǵan deıin atalǵan sharada elimizdiń kıberqaýipsizdik salasyndaǵy jetistikterin bólisýge daıyn ekeni aıtyldy.

Aıta keteıik, Bishkekte alǵashqy Eýrazııa ekonomıkalyq forýmy ótip jatyr.