Óńdeý ónerkásibinen salyq túsimderiniń kólemi 3 esege artty
NUR-SULTAN. QazAqparat - Óńdeý ónerkásibinen salyq túsimderiniń kólemi 3 esege artty. Bul jaıynda QR Premer-Mınıstri Asqar Mamınniń Májilis depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.
«Indýstrııalandyrýdy damytýdyń 10 jyly ishinde óńdeý ónerkásibinen túsetin salyq túsimderiniń kólemi 2009 jylǵy 432 mlrd teńgeden 2019 jyldyń 9 aıynda 1 015 mlrd teńgege deıin jáne óndiris kólemi úsh ese artty. Kúndelikti júrgizilgen jumystardyń nátıjesinde aıtarlyqtaı oń nátıje baıqalady», - dedi Asqar Mamın.
Úkimet basshysynyń aıtýynsha, ótken jyldyń ishinde ǵana negizgi kapıtalǵa 994 mlrd teńge mólsherinde ınvestıtsııa tartylǵan. Al óńdeý ónerkásibiniń óndiris kólemi 11,2 trln teńgege jetip otyr.
«Óńdeý ónerkásibindegi keıbir sandyq kórsetkishterdiń tómen ósimine, sonymen qatar olardyń tómendeýine birqatar obektıvti sebepterdiń yqpal etkendigin atap ótken oryndy. Aıtalyq, óndirý ósiminiń tómen qarqyny jalpy qosylǵan qunnyń naqty kólem ındeksiniń ósim qarqynynyń jospardan asyp túskenine qaramastan óńdeýshi sektorda jumyspen qamtylǵandar sanynyń artýymen baılanysty», -dedi Asqar Mamın.
