Óńdeý ónerkásibine 7 paıyzdyq nesıe beriledi

ASTANA. QazAqparat – «Ónerkásipti qoldaý qory» aktsıonerlik qoǵamy óńdeý ónerkásibiniń jobalaryn qarjylandyrý baǵdarlamasyn iske qosyp jatyr, dep habarlaıdy QazAqparat tilshisi.

Qordyń málimeti boıynsha, Qazaqstan damý banki men Indýstrııa jáne ınfraqurylymdyq damý mınıstrligi shaǵyn, orta jáne iri bızneske óńdeý ónerkásibiniń jobalaryn qarjylandyratyn baǵdarlamany iske qosyp otyr.

Baǵdarlama óńdeý ónerkásibiniń qurylymyn odan ári ártaraptandyryp, joǵary bólinis taýarlarynyń óndirisin yntalandyrýǵa baǵyttalmaq. Sondaı-aq el ekonomıkasyna ishten jáne syrttan ınvestıtsııa tartý kózdelip otyr.

Osy maqsattardy iske asyrý úshin baǵdarlama aıasynda ınvestorlarǵa 250 mlrd teńgeden astam nesıe beriledi. Onyń negizgi sharttary mynandaı:

• lızıngpen qarjylandyrý/nesıelendirý merzimi – 3 jyldan 20 jylǵa deıin;

• qarjylandyrý valıýtasy – teńge;

• syıaqy mólsherlemesi – jyldyq 7 %;

• Bir jobaǵa bólinetin nesıe somasy –3 mlrd teńgeden joǵary.

«Qarjylandyrý úshin jobalardy qaraý barysynda ótinish berýshilerdiń jergilikti qamtý jónindegi talaptarǵa, óz óndirisiniń aınalasyndaǵy shaǵyn jáne orta kásiporyndardy damytý jáne QR zańnamasynda kózdelgen ózge de mindettemeler sııaqty qarymta mindettemelerge basa nazar aýdarylady.

Baǵdarlamany iske asyrý óńdeýshi ónerkásip kásiporyndarynyń negizgi qarajatyn jańartýǵa múmkindik berip, shamamen 10 000 turaqty jumys ornyn qurady», - dep jazylǵan qordyń resmı málimetinde.