Óńdeý ónerkásibi salalarynda ınvestıtsııalyq jobalar pýly ázirlendi - mınıstr
«Ótken jyldyń qorytyndysy boıynsha óńdeý ónerkásibi ımportynyń jalpy somasy 38,3 mlrd AQSh dollaryn qurady. Shamamen 32 mlrd AQSh dollar qarajat Indýstrııa jáne ınfraqurylymdyq damý mınıstrligi jetekshilik etetin salalarǵa tıesili. Óńdeý ónerkásibi salalarynda ınvestıtsııalyq jobalar pýlyn qalyptastyrdyq. Atalǵan jobalar ımportty almastyrýǵa jáne daıyn ónimdi eksporttaýǵa baǵyttalǵan», - dedi mınıstr.
Qaıyrbek Óskenbaevtyń dereginshe, birinshi topta 700-ge jýyq joba qamtylǵan. Onyń ishinde 286-sy - ımportty almastyratyn jobalar. Pýldaǵy 95 joba ekinshi topqa, ıaǵnı ımportty almastyrýǵa daıyndyǵy ortasha taýarlarǵa jatady. Úshinshi top boıynsha 36 jobany júzege asyrý úshin taýarlar tizbegi aıqyndaldy. Atalǵan taýarlar boıynsha belsendi túrde ınvestorlar izdestirilýde.
«Birinshi topqa qazirdiń ózinde otandyq kásiporyndarda óndirilip jatqan ónimderdi shyǵarýǵa baǵyt alǵan 155 joba engizildi. Alaıda, atalǵan taýarlar ımportty tolyq almastyrýy úshin óndiris kólemin ulǵaıtýymyz qajet», - dedi ol.
Onyń aıtýynsha, buqaralyq aqparat quraldarynda ımportty almastyratyn jobalar týraly habarlama jarııalanǵan soń kóptegen belsendi kásipker pýlǵa kirýge mınıstrlikke ótinish bildirdi.
«Baılanys ortalyǵy arqyly kásipkerlerge pýlǵa kirý boıynsha mamandar tarapynan keńes berilýde. Aıta keterligi, mınıstrlikte oblystar boıynsha bekitilgen jáne joba bastamashylarymen tikeleı jumys isteıtin joba menedjerlerinen turatyn top bar. Jumys barysynda jobalyq ádis-tásilder men EasyProject aqparattyq júıesindegi monıtorıngke arnalǵan tsıfrlyq quraldar qoldanyldy. Osy rette jobalardyń sany boıynsha ózgertýler men túzetýler engizilýde. Jalpy óńdeýshi ónerkásipte 108 myń jumys ornyn qurýmen ınvestıtsııalar kólemi 20,5 trln teńgege 633 joba tıesili. Taý-ken óndirý salasy, agroónerkásiptik keshen jáne ınfraqurylymdyq damý salalaryna 8 myń jumys ornyn qurýmen ınvestıtsııalar kólemi 1,3 trln teńgeni quraıtyn 57 joba kiredi», - dedi Qaıyrbek Óskenbaev.
