Elimizde óńdeý ónerkásibiniń ósimi 9,8%-dy qurady
ASTANA. KAZINFORM – Jarty jyldyń qorytyndysy boıynsha óńdeý ónerkásibiniń kólemi 9,8%-ǵa ósip, óndirilgen ónim kólemi 16 trıllıon teńgege jetti. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev málim etti.
Mınıstrdiń aıtýynsha, rezeńke jáne plastmassa buıymdary, jeńil ónerkásip ónimderi, kıim, toqyma buıymdary, avtomobılder, tirkeme jáne jartylaı tirkemeler óndirisiniń artýy ımportty almastyrýǵa múmkindik berdi. Sonymen qatar shıkizattyq emes taýarlar eksporty 14,6%-ǵa ósip, shamamen 12 mıllıard dollardy qurady. Eksporttyń negizgi bóligin metallýrgııa, mashına jasaý, hımııa ónerkásibi jáne qurylys materıaldary ónimderi qurap otyr.
– Mınıstrlik qyzmetiniń negizgi baǵyttarynyń biri retteletin satyp alýlar arqyly otandyq taýar óndirýshilerdi qoldaý. Memlekettik satyp alýda 5323 pozıtsııada otandyq ónimge basymdyq berildi. Jarty jyl ishinde memlekettik organdar 82 mıllıard teńge bolatyn 45 myńnan astam shart jasady. «Samuryq-Qazyna» qory qoldanǵan 16 shara aıasynda otandyq taýar óndirýshilermen 3800 kelisimshart, onyń ishinde jalpy quny 390 mıllıard teńgeden asatyn 286 uzaq merzimdi jáne ofteık-kelisimshart jasaldy, – dedi Ersaıyn Naǵaspaev.
Sondaı-aq mınıstrdiń málimetinshe, jer qoınaýyn paıdalaný salasynda jalpy quny 123 mıllıard teńgeni quraıtyn 425 satyp alý sharty rásimdeldi. Qabyldanǵan sharalar turaqty suranysty qalyptastyryp, otandyq kásiporyndardyń óndiristik qýatyn arttyrýǵa yqpal etip otyr.
– Máselen, Shymkent qalasyndaǵy transformator óndirisi 90%-ǵa, Semeıdegi kabel óndirisi 72%-ǵa, Qaraǵandydaǵy arqan óndirisi 71%-ǵa deıin jetti, – dep tolyqtyrdy mınıstr.
Aıta keteıik, Qazaqstan men Reseıdiń birlesken ónerkásiptik jobalary 52,7 mlrd dollarǵa jetti.
