Óńdeý ónerkásibindegi ósim baıaýlap, aýyl sharýashylyǵy maýsymdyq ósim kezeńine endi
ASTANA. KAZINFORM — Bıyl 9 aıda 12,9 mln sharshy metr turǵyn úı paıdalanýǵa berildi. Bul týraly Úkimet otyrysynda Ulttyq ekonomıka birinshi vıtse-mınıstri Azamat Ámrın aıtty.
- Óńdeý ónerkásibindegi ósim kólik jasaý óndirisiniń 14 paıyzǵa, onyń ishinde avtomobıl jasaýdyń – 16,8, tamaq ónimderiniń – 9,8, hımııa ónerkásibiniń – 9,6, munaı óńdeý ónimderiniń – 7,5, metall buıymdarynyń 15,2 paıyzǵa ulǵaıýy esebinen qamtamasyz etildi. Óńdeý ónerkásibindegi ósimniń baıaýlaýyna metallýrgııadaǵy qarqynnyń 0,3 paıyzǵa deıin baıaýlaýy áser etti. Bul rette qara metallýrgııadaǵy óndiris 0,9 paıyzǵa tómendedi, - dedi Azamat Ámrın.
Onyń aıtýynsha, taý-ken ónerkásibindegi óndiris kólemi 9,3 paıyzǵa ósti. Sala qurylymynda tabıǵı gaz óndirý - 15,2, munaı óndirý - 13,2, kómir óndirý 10,4 paıyzǵa ulǵaıdy. Sonymen birge metall kenderin óndirý 0,3 paıyzǵa qysqardy.
- Ósimge qaramastan, qurylysta 9 aıdyń qorytyndysy boıynsha qarqynnyń aıtarlyqtaı baıaýlaýy baıqalady. Qurylys jumystary kóleminiń ósýi 14,9 paıyzdy qurap, 3,2 paıyzdyq tarmaqqa baıaýlady. Qurylystyń ósýi 17 óńirde tirkeldi. Bul rette eń joǵary ósý Astana, Almaty qalalarynda, Soltústik Qazaqstan, Aqmola jáne Túrkistan oblystarynda baıqaldy. Qurylys jumystary kóleminiń tómendeýi Atyraý jáne Abaı oblystarynda, Shymkent qalasynda baıqaldy. 12,9 mln sharshy metr turǵyn úı paıdalanýǵa berildi, bul ótken jyldyń sáıkes kezeńinen 3,4 paıyzǵa artyq. Eń joǵary kórsetkishter Ulytaý, Almaty, Jetisý, Túrkistan oblystarynda, Almaty qalasynda baıqalady, - dedi ol.
Vıtse-mınıstr aýyl sharýashylyǵy maýsymdyq ósim kezeńine engenin aıtty.
- Saladaǵy jalpy ónim kólemi 4,4 paıyzǵa artyp, qańtar-tamyzben salystyrǵanda 1,0 paıyzdyq tarmaqqa jedeldedi. Aıtarlyqtaı ósim dándi daqyldardy jınaýdyń joǵary qarqynyna baılanysty. Nátıjesinde ósimdik sharýashylyǵyndaǵy ósim 5,2 paıyz boldy. Jalpy sala boıynsha eń joǵary ósimdi Soltústik Qazaqstan, Qostanaı, Aqmola oblystary kórsetti. Barlyq 7 negizgi kórsetkish boıynsha ósý 11 óńirde tirkeldi. Atyraý, Ulytaý, Abaı oblystarynda jáne Shymkent qalasynda 3 kórsetkish boıynsha quldyraý bar, - dedi vıtse-mınıstr.
Osy oraıda Azamat Ámrın turaqty ekonomıkalyq ósimdi ustap turý maqsatynda ortalyq jáne jergilikti atqarýshy organdar mynadaı sharalarǵa basa nazar aýdarýy qajettigin aıtty:
- ınfraqurylym salýǵa jáne mashına jasaýdy qoldaýǵa bólingen bıýdjet qarajatynyń ıgerilýine baqylaýdy kúsheıtý;
- ınvestıtsııalyq jobalardy qarjylandyrý úshin bıýdjetten «Báıterek» holdıngine qarajat bólýdi jalǵastyrý;
- osy jyldyń sońyna deıin óńdeý ónerkásibinde josparlanǵan ınvestıtsııalyq jobalardyń aıaqtalýyn jáne iske qosylýyn qamtamasyz etý;
- kútilip otyrǵan egindi tolyq kólemde jınaýǵa jaǵdaı jasaý.
Aıta keteıik, Úkimet otyrysynda 2025 jylǵy qańtar-qyrkúıek aılaryndaǵy áleýmettik-ekonomıkalyq damý qorytyndylary men respýblıkalyq bıýdjettiń atqarylý barysy talqyǵa salynyp jatyr.