Óńdeý ónerkásibi: Shymkentte 12 joba iske qosylyp, 1000 jumys orny ashyldy
ShYMKENT. KAZINFORM – Shymkentte óńdeý ónerkásibi salasynda 12 joba iske qosylyp, 1000-nan astam jańa jumys orny ashyldy. Bul týraly Shymkent qalasynyń ákimi Ǵabıt Syzdyqbekov aıtty.
«Memleket basshysy elimizde óńdeý ónerkásibin 1,5 ese ulǵaıtyp, eńbek ónimdiligin arttyrýdy tapsyrǵan bolatyn. Osy baǵytta bıyl quny 78,2 mlrd teńgeni quraıtyn 16 jobanyń 12-si iske qosylyp, 67,1 mlrd teńge ınvestıtsııa tartyldy. Onda 1000-nan astam jańa jumys orny ashyldy. Onyń ishindegi iri jobalar: Transulttyq «COCA-COLA» kompanııasynyń alkogolsiz sýsyndar óndirý jobasy. Quny — 27 mlrd teńge, qýattylyǵy — jylyna 262 mıllıon lıtr daıyn ónim shyǵarady. Kásiporynda 100-ge jýyq turaqty jumys oryndary ashyldy. Kelesi, «Wan Sheng Ceramic» kompanııasy salǵan keramıkalyq taqtaıshalar óndirý zavody jylyna 13 mıllıon sharshy metr taqtaıshalar óndiredi. Quny 25,5 mlrd teńge, ashylǵan jumys orny 350 adamdy qamtıdy. Kelesi jyly ekinshi kezeńi qurylysyn bastap, jylyna qosymsha 12,5 mıllıon sharshy metr taqtaıshalar óndirý josparlanýda. Onyń quny 12 mlrd teńge, ashylatyn jumys orny shamamen 300 adamdy qamtıdy», - dedi ol OKQ alańynda ótken baspasóz máslıhatynda.
Sondaı-aq ákim bıylǵy 10 aıda qala ekonomıkasynyń ósimi 12 paıyzǵa jetkenin atap ótti. Onyń ishinde tartylǵan ınvestıtsııa 9 paıyzǵa, qurylys jumystarynyń kólemi 27 paıyzǵa, paıdalanýǵa berilgen turǵyn úı alańy 42 paıyzǵa, saýda kólemi 19 paıyzǵa, kólik qyzmeti 26 paıyzǵa, ónerkásiptegi ónim kólemi 2 paıyzǵa artqan.
