Óńdeý ónerkásibi 9,8%-ǵa ósti: Jumanǵarın ekonomıkanyń negizgi draıverlerin atady
ASTANA. KAZINFORM- QR Premer-mınıstriniń orynbasary – ulttyq ekonomıka mınıstri Serik Jumanǵarınniń tóraǵalyǵymen ekonomıkalyq ósýdi qamtamasyz etý jónindegi shtabtyń kezekti otyrysy ótkizildi, dep hebarlaıdy Úkimettiń baspasóz qyzmeti.
Otyrysqa qatysýshylar munaı óndirý kóleminiń ýaqytsha tómendeýi jaǵdaıynda ekonomıka ósýiniń negizgi draıveri bolyp qalatyn munaı emes sektor salasyn damytýǵa basa nazar aýdardy. Olar – qurylys, óńdeý ónerkásibi, saýda, kólik jáne aýyl sharýashylyǵy.
Qurylysta eń joǵary ósý qarqyny saqtalyp otyr. Jeti aıdyń qorytyndysy boıynsha qurylys jumysy kólemin odan ári ulǵaıtý men sala damýynyń joǵary serpinin saqtaý mejelenýde. Ulytaý, Abaı men Qyzylorda oblystarynda eń joǵary ósý qarqyny oryn alýy múmkin.
Óńdeý ónerkásibi óndiris kóleminiń 9,8%-ǵa ulǵaıýy da senimdi ósýdi kórsetedi. Negizgi úlesti mashına jasaý (+23,2%), hımııa ónerkásibi (+19,0%), azyq-túlik óndirisi (+14,7%) men jeńil ónerkásip (+89,2%) qamtamasyz etýde. Jeti aıdyń qorytyndysy boıynsha da osyndaı ósý qarqyny saqtalady degen boljam bar.
Saýdada da oń dınamıka saqtalýda. Birinshi jartyjyldyq qorytyndysy boıynsha, taýar aınalymy 36,2 trln teńgege jetken. Al saýdadaǵy naqty kólem ındeksi – 105,7%. Salanyń odan ári ósýi úshin óńirlerge jańa ınvestıtsııalyq jobalardy iske qosýdy kózdeıtin Saýdany damytýdyń jol kartasyn júzege asyrý tapsyryldy.
Kólik salasyndaǵy ósý qarqyny tasymaldaý kólemi jalpy ulǵaıǵanmen, munaı men gaz tasymaldaýdyń tómendeýi arqyly shekteletini atap ótildi. Osyǵan baılanysty, Serik Jumanǵarın eldiń tranzıttik áleýetin, eń aldymen, temirjol jáne avtomobıl baǵytynda barynsha paıdalanýdy tapsyrdy.
Jeti aıdyń qorytyndysyna boıynsha aýyl sharýashylyǵynda turaqty ósim bar. Sondaı-aq azyq-túlik pen sýsyn óndirisiniń ulǵaıýy oryn almaq. Egin jınaý naýqanyn júrgizý, mal sharýashylyǵyn damytý, agroónerkásiptik keshendi jeńildikpen qarjylandyrýdyń rekordtyq kólemi arqyly oń dınamıka qalyptastyrylady. 2024-2025 jyldary qurylysy jeńildikti shartpen qarjylandyrylyp, búginde jobalyq qýatqa shyqan taýarly sút fermalary salanyń ósýine eleýli úles qosa bastady. Ol qazirdiń ózindegi sút óndirisiniń ulǵaıýynan kórinýde. 2026 jylǵy birinshi jartyjyldyq qorytyndysynda sút óndirý kólemi 1,9 mln tonnaǵa jetip, 2025 jylǵy sáıkes kezeńmen salystyrǵanda 2,4%-ǵa artty.
Otyrysty qorytyndylaı kele Serik Jumanǵarın Qazaqstanda uzaqmerzimdi ekonomıkalyq ósýdi qamtamasyz etýi tıis aýqymdy ınfraqurylymdyq jobalardy júzege asyrý jalǵasyp jatqanyn atap ótti.
-Osyǵan baılanysty, uzaqmerzimdi ekonomıkalyq tıimdilikti qamtamasyz etetin jáne óńirlik standarttar júıesinde kózdelgen, respýblıkalyq bıýdjet esebinen qarjylandyrylatyn kópirlerge, ótkelderge, negizgi kólik magıstraldary men energetıka nysandaryna erekshe nazar aýdara otyryp, densaýlyq saqtaý men áleýmettik sala obektileri sapaly jobalardy daıyndaýy qajet. Elimizde belsendi damý jalǵasýda, sol sebepti de júzege asyrylatyn jobalardyń kólemi jyl saıyn artyp otyrýy tıis, — dep atap ótti vıtse-premer.
Osyǵan deıin Úkimettiń tsıfrlandyrý men jasandy ıntellektini damytýdyń aýqymdy josparyn iske asyryp jatqany týraly jazdyq.
