Óńdeý ónerkásibi 2025 jyly 6,1%-ǵa ósip, óndiris kólemi 16 trln teńgeden asty

ASTANA. KAZINFORM – Úkimet Prezıdent Qasym-Jomart Toqaevtyń tapsyrmasyna sáıkes, elimizdiń ónerkásiptik berik irgetasyn qurý boıynsha keshendi jumys júrgizip keledi. Otandyq taýar óndirýshilerdi qoldaýǵa jáne óńdeýshi salany damytýǵa erekshe kóńil bólinip otyr. Bul týraly Úkimettiń baspasóz qyzmeti habarlady. 

Ónerkásip jáne qurylys mınıstri Ersaıyn Naǵaspaev ındýstrııalandyrý nátıjeleri óńdeý ónerkásibiniń turaqty ósýin kórsetip otyrǵanyn atap ótti.

— Bıylǵy 7 aıdyń qorytyndysy boıynsha óńdeý ónerkásibi 6,1%-ǵa ósti, al ónim óndirý kólemi 16 trln teńgeden asty. Bul jerde ekonomıkadaǵy óńdeý ónerkásibiniń úlesi 13,9%-ǵa deıin artqanyn atap ótkim keledi, — dedi mınıstr.

Otandyq óndiristiń ósýin yntalandyrý maqsatynda qarjylyq qoldaý quraldary paıdalanylýda.

— Biz jergilikti, otandyq óndirýshilerdiń ósýin yntalandyrý maqsatynda belsendi jumys júrgizip jatyrmyz: óńdeý ónerkásibiniń 115 jobasyn qoldaýǵa 500 mlrd teńge bólindi. Bul «Báıterek» holdıngi sııaqty damý ınstıtýttary arqyly júzege asyryldy, — dep atap ótti Ersaıyn Naǵaspaev.

Sonymen qatar memlekettik satyp alýda otandyq óndirýshilerge basymdyq berildi: 2025 jyldyń 7 aıynda satyp alý kólemi 1,5 esege ósip, jalpy quny 1,2 trln teńgeden asty.

Taǵy bir mańyzdy qoldaý quraly — qazaqstandyq taýar óndirýshilerdiń biryńǵaı tizilimi, ol satyp alýdyń ashyqtyǵyn arttyryp, jalǵan óndirýshilerdi joıýǵa múmkindik beredi. Onyń iske qosylýy osy jyldyń kúzine josparlanǵan. 

Aıta ketelik bıyl jer qoınaýyn paıdalanýshylarmen 901 mlrd teńgege 551 kelisimshart jasaldy.