Ondaı da tarıf bar — «Báıterek» basshysy ınternetke qansha tóleıtinin aıtty

ASTANA. KAZINFORM — «Báıterek» holdınginiń» basqarma tóraǵasy Rýstam Qaraǵoıshın uıaly baılanys pen ınternetke aı saıyn neshe teńge tólep júrgenin aıtty.

— Men de uıaly telefon qoldanamyn. Uıaly baılanys operatorlary maǵan tarıftiń qymbattaıtyny týraly habarlama jibergen joq. Internetpen qosqanda aı saıyn 3900 teńge tóleımin. Ázirge tarıf qymbattaıtyny týraly habarlama kelgen joq. Osyndaı tarıf bar, — dedi Rýstam Qaraǵoıshın Úkimet otyrysynan keıin ótken baspasóz máslıhatynda.

Sondaı-aq, ol eldegi ınflıatsııaǵa qaramastan holdıng tutynatyn qyzmetterdiń eshbiri kúrt qymbattamaǵanyn atap ótti. 

— Bizdiń holdıng tutynatyn qyzmetterdiń bári negizinen arendalyq qyzmetter. Sondyqtan baǵanyń sonshalyq bir kúrt ósip jatqanyn kórip otyrǵan joqpyz. Jetkizýshiler tenderden lot utyp qyzmet kórsetedi. Olardyń kóbi naryqta talaıdan beri jumys istep keledi. Biz keńselerdi de jaldap paıdalanamyz. Bul jerde de kúrt ósim kórip otyrǵan joqpyz, — dedi holdıng basshysy.

Eske salsaq, Májilis depýtaty Janarbek Áshimjan Altel, Tele2, Beeline kompanııalarynyń tarıf saıasatyn «sóz baılasý» faktisine tekserýdi suraǵan edi.