Ońdasyn Orazalın praımerızge qatysqan úmitkerlerge daýys berdi

AQTÓBE. QazAqparat - Partııanyń Aqtóbe oblystyq fılıaly tóraǵasy, oblys ákimi Ońdasyn Orazalın onlaın túrinde úmitkerlerge daýys berdi, dep habarlaıdy QazAqparat tilshisi.

Elimizde alǵash ret ótkizilip otyrǵan partııaishilik saılaý - praımerızdiń qoǵamdaǵy alar orny erekshe ekenin aıtyp ótken aımaq basshysy úmitkerlerdiń barlyǵyna sáttilik tiledi.

«Oblysta 30 myńnan astam partııa múshesi bolsa, qazirgi tańda 20 myńy tańdaýyn jasap, daýys bergen. Praımerızdiń ereksheligi sol eldegi ártúrli problemaǵa úlken janashyrlyqpen qaraıtyn óz ortamyzda júrgen azamattardy iriktesek, oǵan tek partııa músheleri ǵana emes, qoǵamǵa ózgeris jasaýǵa nıetti árbir azamatqa da múmkinshilik berildi. Búgin partııanyń oblystyq fılıaly tóraǵasy retinde tizimdegi azamattarǵa túgel qoldaý kórsettim»,-dep atap ótti Ońdasyn Orazalın.

«Nur Otan» partııasy Aqtóbe oblystyq fılıaly tóraǵasynyń birinshi orynbasary Erbol Danaǵulovtyń aıtýy boıynsha praımerızge Aqtóbe oblysynan 460 úmitker qatysty. Al qala boıynsha 138 úmitker baq synady. Olar partııalastarymen birge 5 myńnan astam kezdesý ótkizgen. Jarııa pikirsaıystarda túrli máseleler kóterip, ońtaıly sheshý joldaryn usyndy.
Oblys boıynsha 118 daýys berý orny ashyldy. Onyń 76-sy onlaın formatta bolsa, 42 oryn qaǵaz bıýlletenimen daýys berýge arnalǵan.