Ońdasyn Orazalın: Óńirdegi sýbsıdııa daýyna memlekettik qyzmetshiniń qatysy joq

NUR-SULTAN. QazAqparat – Sýbsıdııa qarajatyn jymqyrý isi boıynsha Aqtóbe oblysynda kimderdiń ústinen is qozǵaldy? Búgin Ortalyq kommýnıkatsııalar qyzmetinde ótken brıfıngide Aqtóbe oblysynyń ákimi Ońdasyn Orazalınge BAQ ókilderi osyndaı suraq qoıdy, dep habarlaıdy QazAqparat tilshisi.

«Siz sheneýnik dep memlekettik qyzmetshilerdi meńzep otyrsańyz sýbsıdııa daýyna ilingen adamdardyń arasynda memlekettik qyzmetshiler joq. Maǵan jetken aqparat boıynsha, qylmystyq is kún panelderin satyp alyp, ornatý boıynsha qozǵalǵan. Mundaı sharaǵa memlektten 80 paıyzǵa deıin sýbsıdııa qarastyrylǵan edi. Meniń bilýimshe, atalmysh jumyspen Ulttyq agrarlyq-ǵylymı bilim ortalyǵynyń Aqtóbe oblysyndaǵy ókilderi aınalysqan. ıAǵnı bular memlekettik qyzmetshi emes» - dep jaýap berdi Ońdasyn Orazalın.

Sondaı-aq, ol oblys aýmaǵynda tergeý sharalary áli júrip jatqanyn atady.

«Atalmysh ulttyq ortalyqtyń 2 qyzmetkeri ustaldy. Jergilikti atqarýshy organdar boıynsha aıtsaq, suratylǵan qajetti qujattyń bárin berdik. Bul jerde sharýa qojalyqtarynyń qyzmetine baılanysty qujattar bolsa kerek. Búgingi tańda jergilikti ákimdik qyzmetkerlerine qandaı da bir naqty aıyp taǵylyp otyrǵan joq. Qalǵanyn tergeý jumystary kórsetedi», - dedi oblys basshysy.