Ońdasyn Orazalın: Halyqqa «Týǵan jer» jobasynyń basymdyqtaryn kórsetkimiz keledi
«Týǵan jer» jobasy tolyǵyp keledi. Bıznes tarapynan atalmysh joba úlken qoldaý taýyp, óńirlerde kóptegen is-sharalar men josparlar bekitildi. Atalǵan josparlar boıynsha ártúrli formatta is-sharalar qabyldanýda. Bıyl joba sheńberinde respýblıkada jyldyń basynan beri úsh myńnan asa is-shara júzege asyryldy. Ár óńirdiń ózindik jaqsy bastamalary, jetistikteri men ozyq tájirıbeleri bar», - dedi Ońdasyn Orazalın QR Prezıdent Ákimshiliginiń Basshysy Áset Isekeshevtiń tóraǵalyǵymen ótken Qoǵamdyq sanany jańǵyrtý baǵdarlamasyn júzege asyrý boıynsha ulttyq komıssııanyń kezekti otyrysynda.
«Týǵan jer» jobasy boıynsha jumys toby jetekshisiniń aıtýynsha, osy jyldyń maýsym aıynda jobanyń iske asyrylýy keshendi túrde tekserilip, onyń qorytyndysy boıynsha óńirlerdiń ózara tájirıbe almasý máseleleleri talqylanǵan.
«Aldaǵy ýaqytta qoǵamdyq sanany jańǵyrtýda tıimdiligin kórsetken mańyzdy baǵyttarǵa qaraı jumysty úılestirip, Prezıdenttiń 5 qazandaǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýyn esepke alý kózdelýde. Biraq, bul rette birqatar nazarǵa alarlyq tustar bar. Birinshiden, bizde bul baǵytta ortalyq organdar men jergilikti atqarýshy organdardyń jumysyn áli de kúsheıtý kerek. Sebebi, kommýnıkatsııa jobalyq keńseniń mamandarynyń deńgeıinde ǵana júzege asyrylady. Bunyń arty birshama suraqtar týyndatyp otyr. Óıtkeni, aımaqtyq keńselerdiń jumysyna jetkilikti deńgeıde mańyz berilmeıdi. Jobanyń júzege asyrylýyna tolyqqandy monıtorıng júrgizý qajet dep esepteımiz», - deıdi Ońdasyn Orazalın
Sonymen birge, Ońdasyn Orazalın jobanyń iske asyrylý jolynda aımaqtar úshin biryńǵaı kórsetkishter júıesin qurýdy usyndy.
«Baǵdarlama boıynsha bizge qaǵaz júzinde qabat-qabat esepter kelip jatyr. Ony tipti oqyp bitý múmkin emes. Jumys atqarylyp jatqanymen, jalpy úılesim men monıtorıng joq. Osyǵan baılanysty «Rýhanı jańǵyrý» baǵdarlamasy aıasynda atqarylǵan sharýalardy esepke alý júıesin engizý kerek dep esepteımiz», - deıdi ol.
«Týǵan jer» jobasy boıynsha Ońdasyn Orazalın taǵy bir mańyzdy máselege nazar aýdarýdy eske saldy.
«Jobany aqparattyq turǵyda qoldaý boıynsha aıtarym bar. Aımaqtarǵa suraqtar kóp. Jaǵdaı mynada. Qazirgi tańda keıbir is-sharalardyń pıar-sıpaty baıqalyp qalyp jatyr. Al biz halyq pen bıznes úshin joba men atqarylǵan jumystyń basymdyqtaryn kórsetkimiz keledi», - deıdi ol.
