Ońdasyn Orazalın COVID-19-ǵa shaldyqqan naýqastardyń jaǵdaıyn bildi
Aqtóbedegi ftızıopýlmonologııalyq ortalyq 500 tósek-orynǵa eseptelgen. Sonyń ishinde 75 reanımatsııalyq oryn bar. Emdeý mekemesine barǵan óńir basshysy qabyldaý bólmesi, reanımatsııalyq, rentgen-dıagnostıkalyq bólimderdi qarap shyqty.
Ftızıopýlmonologııalyq ortalyqtyń bas dárigeri Erlan Tátimovtiń aıtýynsha, naýqastar túsken kezde PTR test tapsyryp, nátıjesi bir saǵattyń ishinde shyǵarylady. Sondaı-aq, qabyldaý bólmesinde rentgen zertteýi jasalady. Bul dıagnoz qoıyp, soǵan saı em taǵaıyndaýǵa yńǵaıly. Mekeme tolyǵymen joǵary bilikti medıtsınalyq kadrlarmen qamtamasyz etilgen. Ortalyqtyń 11 qyzmetkeri qosymsha ınfektsıonıst, 11 qyzmetkeri pýlmonolog mamandyqtaryna oqytyldy. Juqpaly aýrýlar bóliminiń jumysyna angıohırýrg, kardıolog, endokrınolog, nevrolog pen hırýrg sekildi barlyǵy 24 maman tartylǵan. Munda dári-dármektiń eki aılyq qory jınalyp, materıaldyq-tehnıkany nyǵaıtý sharalary qabyldanǵan. Ókpeni jasandy jeldetetin 75 apparat, bıohımııalyq gemotologııalyq taldaǵysh, rentgen-dıagnostıkalyq qondyrǵy, kompıýterlik tomograf, fýnktsıonaldy kereýetter bar. Reanımatsııa bólimine de jóndeý júrgizilip, qýaty mınýtyna 600 l bolatyn ottekti-kontsentratty stansa ornatylǵan. Bul maqsatqa byltyr bıýdjetten 618 mln teńge bólindi.
Naýqastarǵa kirip shyqqan Ońdasyn Orazalın aqtóbelikterdiń hal-jaǵdaılaryn surap, tez saýyǵyp ketýin tiledi.
«Óńirdiń epıdemıologııalyq jaǵdaıy aıtarlyqtaı kúrdeli. Árıne, biz tıisti sharalardy qabyldap jatyrmyz. Eń bastysy – pandemııanyń birinshi tolqynyndaǵy qatelikterdi qaıtalamaýymyz kerek. Emdeý mekemeleriniń materıaldyq-tehnıkalyq bazasyn nyǵaıtýǵa az qarjy aýdarylǵan joq. Dárilik zattarmen qamtamasyz etý máselesi sheshildi. Men sizderdiń kásibı biliktilikterińiz ben janqııarlyqtaryńyzǵa shúbá keltirmeımin. Ókinishke qaraı bári de óńir turǵyndaryna baılanysty. Epıdemıologııalyq jaǵdaıdyń nasharlaýy aqtóbelikterdiń qaýipsizdik sharalaryn saqtamaýynyń saldarynan bolyp otyr. Kóp nárse bizge baılanysty», - dep atap ótti oblys ákimi.
Densaýlyq saqtaý basqarmasynyń basshysy Rústem Isaevtiń aıtýynsha, 41 medıtsınalyq mekeme, sonyń ishinde 15 ınfektsııalyq statsıonar, 21 alǵashqy medıtsınalyq-sanıtarlyq kómek kórsetý uıymy, rezervte bes statsıonar bar.
Medıtsınalyq mekemelerde 3063 tósek-oryn daıyn. Qazirgi tańda ınfektsııalyq statsıonarlarda 388 adam em alyp jatyr. 36 adam karantın statsıonarynda. Aqtóbe, Hromtaý, Qandyaǵash pen Shalqar qalalarynda 19 tomografııa kabıneti jumys isteıdi, 10 zerthanada PTR dıagnostıkasy jasalady. Olardyń qýaty táýligine 5380 taldaý júrgizýge múmkindik beredi. Vaktsına egý bastalǵaly beri oblysqa 17800 doza ákelinip, 7460 aqtóbelik egildi.
