Ońdasyn Orazalın «CNPC-Aqtóbemunaıgazdaǵy» aılyq teńsizdigi týraly pikir bildirdi
NUR-SULTAN. QazAqparat – Aqtóbe oblysynyń ákimi Ońdasyn Orazalın «CNPC-Aqtóbemunaıgaz» kompanııasyndaǵy aılyq teńsizdigi týraly pikir bildirdi, dep habarlaıdy QazAqparat tilshisi.
«Birinshiden, men kez kelgen kásiporyndaǵy ereýilderdi jumysshy taptyń óz quqyǵyn qorǵaý kúresi dep qaraımyn. Bul – bárimiz mektep qabyrǵasynan beri biletin aksıoma shyǵar. Osylaı qarasaq, men bul jaǵdaıdan sonshalyq tragedııa kórip turǵan joqpyn. Qandaı da bir kásiporynnyń jumysshylary eńbek jaǵdaıyna, eńbekaqy deńgeıine kóńili tolmasa, óz máselelerin sheshýge quqyly. Kásipodaqtardyń kelissózderi bar. Eger másele onymen sheshilmese, ereýilge shyǵa alady», - dep bastaǵan ákim halyqaralyq tájirıbede bul másele jumysshy men jumys berýshi arasynda jeke sheshiletinin atady.
«Mysaly, Tehastyń nemese tipti Reseı oblystarynyń gýbernatory osyndaı máseleni sheshýmen anılasyp júrgenin elestete almaımyn. Ókinishke qaraı, bizde «bárine ákim jaýapty» degen praktıka qalyptasqan. Árıne, bul máselede men ózime jaýapkershilik aldym. Qazir máseleni sheshý úshin qolymnan kelgenniń bárin jasap jatyrmyn. Eńbek ınspektsııasy, kásipodaq uıymdary, jumys berýshiler bar. Solardyń arasynda dıalog ornatýǵa kúsh salyp jatyrmyz. Aqtóbe oblysynda jalpy eńbekaqy deńgeıi, óńirdiń áleýetine qaramastan, ortasha respýblıkalyq deńgeıden tómen. Ortasha respýblıkalyq kórsetkish 260-270 myń teńge bolsa, bizde 225 myń teńgege áreń jetedi, - deıdi oblys basshysy.
Onyń málimeti boıynsha, aqtóbelik munaıshylardyń aılyǵy Mańǵystaý, Atyraý oblystaryndaǵy áriptesterine qaraǵanda 2-3 ese tómen kórinedi.
«Bir jaǵynan bul tarıhı jaǵdaıǵa baılanysty osylaı qalyptasqan. Munaı kompanııalarynyń aldyna eńbekaqyny kóterý týraly talap qoıyp otyrmyz. Naqty «CNPC-Aqtóbemunaıgaz» kompanııasy boıynsha aıtsaq, qazir oblystyń jer qoınaýyn ári qaraı paıdalaný týraly kelisimshart qaıta jazylyp jatyr. Osy qujattaǵy negizgi sharttardyń biri – eńbekaqy kólemin ortasha salalyq normamen teńestirý. Budan bóleý áleýmettik sıpattaǵy basqa da sharttar bar», - degen Ońdasyn Orazalın CNPC –diń jeke ózinde de, merdiger uıymdarynda da aılyq boıynsha aıyrmashylyq bar ekenin rastady.
«Bul jerde másele munaıǵa servıstik qyzmet kórsetetin kompanııalar men CNPC-Aqtóbemunaıgaz arasyndaǵy kelisimderge baılanysty bolyp tur. Biz bul iste tarıfti kóterýdi talap etý arqyly ǵana aılyqqa áser ete alamyz. «CNPC- Aqtóbemunaıgazdyń» ózinde ortasha jalaqy boıynsha aıyrmashylyq óte joǵary. Tómengi satydaǵy personal shamamen 200 myń teńge alsa, basqarýshy quramnyń aılyǵy 700 myń teńge kóleminde. Sonda ortasha jalaqy 300 myńnyń aınalasynda. Al qosalqy merdiger kompanııalarda aılyq múlde az. Men 90-120 myń teńge ǵana alatyn qosalqy merdigerler bar ekenin estigende tipti tańǵalǵam», - dedi oblys ákimi.
