Ondaǵan otbasy baspanasyz qalǵan: Qostanaıdaǵy qurylys daýy nemen aıaqtaldy
ASTANA. KAZINFORM — Qostanaıda turǵyn úı qurylysyna azamattardan aqsha tartý kezindegi alaıaqtyq týraly qylmystyq is boıynsha sot protsesi aıaqtaldy, dep habarlaıdy oblystyq prokýratýranyń baspasóz qyzmeti.
Qurylys kompanııasynyń dırektory eki jarym jyl boıy aktsıonerlerden qarajat tartýǵa ruqsatynsyz azamattarmen páter satyp alýǵa shart jasaǵan. Sonymen birge qurylysty aıaqtaý múmkin emestigin bilip, azamattardan aqsha alýdy jalǵastyrdy. 2022 jyldyń sáýirinen 2024 jyldyń qarashasyna deıin 123 mıllıon teńgeden astam qarajat tartyldy, ony kompanııa basshysy óz qalaýy boıynsha ıelikten shyǵardy. Nátıjesinde ondaǵan otbasy ýáde etilgen baspanasyz jáne ınvestıtsııasyz qaldy.
Prokýratýra jábirlenýshilerdiń quqyqtaryn qorǵaý jáne keltirilgen shyǵyndy óteýdi qamtamasyz etý boıynsha sharalar qabyldady.
— Sot talqylaýy barysynda barlyq jábirlenýshilerge keltirilgen shyǵyn tolyq kólemde óteldi. Sot qurylys kompanııasynyń basshysyn alaıaqtyq úshin kináli dep tanyp, oǵan probatsııalyq baqylaý ornatyp, shartty túrde bas bostandyǵynan aıyrý jazasyn taǵaıyndady. Sonymen qatar, oǵan 5 jyl merzimge qurylys uıymdarynda basshylyq qyzmetterdi atqarýǵa tyıym salynady, — delingen habarlamada.
Prokýratýra azamattardy turǵyn úı qurylysyna qarajat salýǵa jaýapkershilikpen qaraýǵa jáne shart jasamastan buryn qurylys salýshyda qajetti ruqsattardyń bolýyn, sondaı-aq aqsha qarajatyn tartýdyń zańdylyǵyn tekserýge shaqyrady. Aldaýdyń nemese buzýshylyqtyń alǵashqy belgileri bolǵan jaǵdaıda dereý quqyq qorǵaý organdaryna júginý qajet.
Budan buryn Qostanaı oblysynda alıment qaryzy bar eki boryshker baspanasyn bergenin jazǵanbyz.
