Ondaǵan avtokólik utysyn oınatqan blogerdiń isi sotqa jetti

ASTANA. KAZINFORM – Jelide birneshe avtokólik utysyn jarııalaǵan qazaqstandyq blogerler Erbolat Janabylov pen Elmıra Tólegenova áreketin Týrızm jáne sport mınıstrligi nazaryna aldy. Bul týraly atalǵan vedomstvonyń baspasóz hatshysy Balym Adamıdenova málim etti.

- 2025 jylǵy 26 tamyzda Erbolat Janabylovqa qatysty Ákimshilik quqyq buzýshylyq týraly kodeksiniń 445-1-babynyń 6-bóligi boıynsha ákimshilik quqyq buzýshylyq týraly hattama toltyryldy jáne onyń advokatynyń ótinishi boıynsha is Astana qalasynyń ákimshilik sotyna joldandy, - degen habar aldyq.

Ákimshilik isti qaraý kúni men ornyn sot aıqyndaıdy.

- Elmıra Tólegenovanyń «elt6i» akkaýnty arqyly áreketin tekserý jalǵasyp jatyr, onyń qorytyndysy boıynsha Oıyn bıznesin jáne lotereıany retteý komıteti tıisti sheshim qabyldaıdy, - deıdi ol.

Eske sala ketsek, buǵan deıin atalǵan blogerler Instagram jelisinde 11 avtokólikti oınatatynyn habarlaǵan edi. Sharty da qarapaıym kóringen, ıaǵnı bar bolǵany jelide repost jasaý kerek. Alaıda 21 tamyzda qatysýshylar tikeleı efırdiń ornyna quny 30 myń teńge turatyn aqyly bıznes kýrs satyp alý kerek bolyp shyqty. Baıqaýǵa qatysý tek sol kýrsty satyp alǵannan keıin ǵana múmkin bolatyny anyqtaldy. Bul jaǵdaı qatysýshylardyń narazylyǵyn týdyryp, olar quqyq qorǵaý organdarynan atalǵan shemanyń zańdylyǵyn tekserýdi surady.

Aıta ketsek, elimizde kýrs satatyn blogerlerge shekteý qoıylatyny aıtylǵan edi. 

Búgin belgili bolǵandaı, qumar oıyndardy nasıhattaýǵa qatysy bar 34 blogerdiń esimi ataldy.