Ondaǵan adamǵa nesıe rásimdetken aqtóbelik emshi jazasyn eki jyldan soń óteıdi

AQTÓBE. KAZINFORM – Sulýshash Qazbaeva 6 jyl 8 aıǵa bas bostandyǵynan aıyryldy. Kámelet jasqa tolmaǵan balasy bolǵan soń jazasyn eki jyldan soń ǵana óteıdi.

Aqtóbe qalalyq sotynda emshi Sulýshash Qazbaevaǵa qatysty is boıynsha úkim oqyldy. Sot sottalýshyny Qylmystyq kodekstiń «Alaıaqtyq» baby boıynsha aıypty dep tanyp, ony 6 jyl 8 aıǵa bas bostandyǵynan aıyrý jazasyn taǵaıyndady. Jazasyn qylmystyq atqarý júıesiniń qaýipsizdigi ortasha túzetý mekemesinde óteýi tıis. Alaıda kámelet jasyna tolmaǵan balasy bolǵan soń jazasyn óteý merzimi 2 jylǵa keıinge shegerildi.

- Qazbaeva paıdakúnemdik nıetipen áreket ete otyryp, 2018 jyldyń qarasha aıynan bastap 2024 jyldyń jeltoqsan aıyna deıingi aralyqta alaıaqtyq jasaǵany, ıaǵnı, aldaý jáne senimdi teris paıdalaný jolymen bótenniń múlkin asa iri mólsherde birneshe ret jymqyrǵany sot tarapynan anyqtaldy. Bir ýaqytta birneshe jábirlenýshige nesıe rásimdetip, aldyrtqan. Jábirlenýshilerden alǵan aqshany qaıtarýǵa múmkindigi bolmaǵan. ıAǵnı ol nesıe tólemderin basqa jábirlenýshilerge nesıe rásimdetip ótegen. Sot Qazbaevanyń kinási tolyq dálelin tapty dep sanaıdy,- dedi sýdıa sot úkimin túsindirý kezinde.

Sottalýshy S.Qazbaevanyń qorǵaýshysy sot úkimimen kelisetinin, apellıatsııalyq shaǵym túsirmeıtinin aıtty. Al jábirlenýshiler qaryzdy óteýin surady.

- Men eki kredıtti jabam dep aıta almaımyn. Sot sheshimi de ádil bolmady. Óıtkeni bank qyzmetkerleriniń qatysy bar. Olardy tergemedi. Enesin, kúıeýin de tergemedi. Sulýshash Qazbaevada bala bolsa, mende de bar. Qaryzym - 3 026 800 teńge. Bir bankke aı saıyn 95 000, ekinshisine 64 876 teńge tóleý kerek. Meniń aılyǵym - 92 myń teńge,- dedi Áıteke bı aýdanynan kelgen jábirlenýshi Maral Jamanbaeva.

Sot otyrysynan keıin prokýror da shaǵym túsiretinin ne túsirmeıtinin naqty aıtpady. Úkimniń zańdylyǵy prokýratýraǵa túsken soń ǵana tekseriledi.

Aıta keteıik, sot azamattyq talap aryzdyń bir bóligin qanaǵattandyryp, shyǵyndy tolyq óteý týraly úkim shyǵardy. Bul jábirlenýshiler óz atyna rásimdegen nesıeni tolyq ótep, sotqa qujatyn usynǵan. Al nesıeni áli tólep jatqan jábirlenýshiler qujatty qaıta jınap, azamattyq talap aryz túsirýi tıis. Sebebi nesıe ósimi bolýy múmkin.

Aıta keteıik, shyǵyn kólemi 579 mıllıon teńge, jábirlenýshiler sany – 136.

Emshi Sulýshash Qazbaeva Áıteke bı aýdany Aqkól aýylynda meshit, Áıteke bı aýdanynda toıhana salamyn, kámelet jasqa tolmaǵan qyzyn Túrkııa eline emge aparamyn, jeke klınıka ashyp, kásibin damytamyn dep ózine kelgen emdelýshilerge nesıe rásimdetken. Іs sotta qarala bastaǵanda 90 jábirlenýshi bolyp, keıin taǵy ondaǵan adam qosyldy.

Oǵan Qylmystyq kodekstiń «Alaıaqtyq» babymen aıyp taǵylyp, bıyl qańtar aıynda qamaýǵa alyndy.