Onda sizge qatysty aqparat bar – Baǵdat Mýsın pasporttaǵy chıpke túsinik berdi

AQTÓBE. QazAqparat – Qazaqstan pasportyndaǵy chıp qujattyń halyqaralyq standartqa saı ekenin bildiredi. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aqtóbeliktermen kezdesýinde aıtty, dep habarlaıdy QazAqparat tilshisi.

Áleýmettik jelide Qazaqstan pasportyndaǵy chıpke qatysty árqıly boljam aıtylyp jatyr. Buǵan deıin QR Іshki ister mınıstrligi bul másele boıynsha aqparat bergen bolatyn.

Búgin Aqtóbege kelgen QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın de chıptiń ornatylý sebebin túsindirdi.

«Pasporttaǵy chıpke qatysty aıtarym, azamattardyń saýattylyǵyn kóterý kerek ekenin kórip otyrmyz. Onyń eshqandaı zııany joq. Zaǵıpa Balıeva Ádilet mınıstri bolǵan kezde ICAO standarttaryna saı bolý úshin jumys atqaryldy. «Halyqaralyq qujatqa chıp engizilýi kerek» degen eskertý 2000 jyldary kelgen. Standartqa saı bolý úshin pasport daıyndaý protsesine ózgeris engizdik. Ol banktiń chıpi sııaqty. Onda sizge qatysty aqparat bar. Aqparatty áýejaıdaǵy, basqa jerde otyrǵan memlekettik qyzmetkerler qaraıdy. «Pasport janymda, qaıda júrgenimizdi baqylap otyrady» dep ýaıymdamańyz. Ol qadaǵalaý úshin jasalǵan nárse emes. Ol pasporttyń halyqaralyq standartqa saı ekenin bildiredi», - dedi Baǵdat Mýsın.

Sonymen birge mınıstr 5G-ge qatysty da túsinik berdi.

«5G aǵzamyzǵa zııan dep te aıtyp jatyr. Aıtarym – dúnıejúzi qarqyndy damyp keledi. Damý úshin biz de tehnologııaǵa beıimdelýimiz kerek. Jańa tehnologııany engizýde sál keshiksek, ekonomıkamyz da, qaýipsizdigimiz de qalady. Sondyqtan beıimdelip, alǵa jyljýymyz qajet. Qaýipsizdik, alaıaqtardan qorǵaý ІІM, UQQ sekildi organdardyń quzyretinde», - dedi vedomstvo basshysy.

Aıta keteıik, Qazaqstandyqtar jeke basyna qatysty qate málimetterdi eGov arqyly onlaın túzetý múmkindigine ıe bolady.