«Ońaımen» tabysyn joǵaltqan tasymaldaýshylar sotqa júginýi múmkin
ALMATY. QazAqparat - «Ońaı» júıesindegi aqaýlardyń kesirinen tabysyn joǵaltqan avtopark ıeleri «Almaty qalasynyń kólik holdıngi» JShS-ny sotqa berýi múmkin. Bul shıelenisti jaǵdaıǵa qatysty qalalyq Jolaýshylar kóligi jáne avtomobıl joldary basqarmasynyń basshysy Maqsut Isahov pikirin bildirdi, dep habarlady QazAqparat tilshisi.
Onyń aıtýynsha, tasymaldaýshylar Ońaı júıesiniń jıi isten shyǵatynyna narazy.
«Ákimdikte qala basshysynyń orynbasary Murat Dáribaevtyń tóraǵalyǵymen arnaıy komıssııa quryldy. Komıssııa «Ońaı» júıesindegi problemalardy zertteýmen aınalyspaq. Biz eki taraptyń da ýájin tekserýimiz kerek boldy. Baıqaǵanymyzdaı jumys istemeıtin termınaldardyń 50 paıyzyn júrgizýshiler ózderi qasaqana óshirip qoıady, al 50 paıyzy kólik holdınginiń tehnıkalyq jumysynyń jetkiliksizdiginen ekeni anyqtaldy. Kólik holdıngi tarapynan tehnıkalyq aqaý bolmaýy kerek. Meniń estýimshe, Green Bus Batu Travel kásiporyndary Kólik holdıngin («Almaty qalasynyń kólik holdıngi» JShS - avt.) sotqa bermek. Men olardy qoldaımyn. Sebebi, olar sonyń kesirinen tabystan aıyryldy. Olar shyǵyndaryn talap etýge quqyly», - dedi Maqsut Isahov.
Basqarma basshysy byltyr Kólik holdıngi men ákimdik memlekettik-jekemenshik áriptestik aıasynda dıspetcherlendirý boıynsha 4 jylǵa kelisimshart jasasqanyn jetkizdi.
«Sol qujatta olarǵa qandaı aıyppul salynatyny ári kerisinshe tasymaldaýshylarǵa qandaı aıyppul qarastyrylǵany kórsetilgen», - dedi Isahov.
