Ońaılatylǵan salyq rejıminde jumys istep kelgen kásipkerlerdiń basym bóligi úshin jaǵdaı ózgermeıdi - Jumanǵarın
ASTANA. KAZINFORM – Astana qalasynda 2026 jyldan bastap kúshine enetin jańa Salyq kodeksin túsindirý boıynsha respýblıkalyq semınarlar serııasy aıaqtaldy.
Qorytyndy is-sharaǵa Premer-mınıstrdiń orynbasary – ulttyq ekonomıka mınıstri Serik Jumanǵarın, qarjy mınıstri Mádı Takıev, sondaı-aq Memlekettik kirister komıteti men «Atameken» kásipkerler palatasynyń ókilderi qatysty.
Óz sózinde Serik Jumanǵarın bıznes úshin mańyzdy máselelerdiń biri - arnaıy salyq rejımderin qoldaný týraly egjeı-tegjeıli toqtaldy.
«Mundaǵy basty qaǵıda: buǵan deıin kim ońaılatylǵan salyq rejıminde jumys istep kelgen bolsa, sol rejımde qalady», - dedi vıtse-premer.
Sonymen qatar óńdeý ónerkásibi úshin erekshe erejeler engizilýde. Vıtse-premer túpki tutynýshymen tikeleı jumys isteıtin kásiporyndarǵa ońaılatylǵan salyq rejımin qoldanýǵa ruqsat etiletinin aıtty.
«Óńdeý ónerkásibiniń bir bóligine ruqsat beremiz. Eń aldymen, ol kásiporyn ofsette nemese iri kásiporyndar úshin jetkizýshi bolyp sanalmaıtyn B2C sektoryna baǵyttalǵan bolýy tıis», - dep atap ótti Serik Jumanǵarın.
Atalǵan sektordyń qalǵan bóligi úshin jalpyǵa birdeı belgilengen salyq salý tártibin qoldaný kózdelgen. Bul tásil mundaı kásiporyndar úshin qoldanystaǵy salyqtyq yntalandyrý sharalarynyń bar ekenimen baılanysty, sonyń ishinde olarǵa óndiristik maqsattaǵy ımport taýarlar boıynsha QQS esepteledi jáne jańǵyrtý jumystary kezinde salyq alynbaıdy. Salany memlekettik qarjylyq qoldaýdyń aýqymdy sharalaryn júzege asyrý da negizgi faktor bolyp sanalady.
«Biz damý ınstıtýttary boıynsha aýqymdy baǵdarlamany bastadyq. "Báıterekti" kapıtaldandyrý bıyl 1 trln teńgege jýyqtady, al úsh jyldyq bıýdjetke jyl saıyn 1 trln teńgeden salyp otyrmyz. Bizdiń bızneske, sonyń ishinde negizinen óńdeý ónerkásibine jasap otyrǵan qoldaý sharalarymyz qomaqty qarjyny talap etedi. Sol sebepti jalpy alǵanda óńdeý salasy qoldaýdan shet qalmaıdy deýge bolady», - dep qorytyndylady Serik Jumanǵarın.
Aıta keteıik, kelesi jyly salyq bereshegi 86 500 teńgeden asqandarǵa ǵana ósimpul esepteledi.