Ońaı jolmen qujat almaq bolǵan aqmolalyq 168 myń teńgesinen aıyryldy
ASTANA. KAZINFORM – Aqmola oblysynyń turǵyny mindetti rásimderdi aınalyp ótip, júrgizýshi kýáligin almaq bolǵan. Alaıda aqyrynda aqshasynan aıyryldy, dep habarlaıdy Kazinform tilshisi.
Aqmola oblysy polıtsııa departamentiniń baspasóz qyzmeti habarlaǵandaı, óńirde júrgizýshi kýáligin zańsyz alýǵa kómektesemin degen jeleýmen jasalǵan alaıaqtyq deregi tergelip jatyr.
Osyndaı shemanyń kezekti qurbany Astrahan aýdany Jaltyr aýylynyń 26 jastaǵy turǵyny boldy. Bıyl sáýirde ol júrgizýshi kýáligin alýǵa kómektesý jóninde shala tanys er adammen kelisedi. «Qyzmeti» úshin oǵan shamamen 168 myń teńge bergen.
Alaıda birneshe aı ótse de, aqmolalyq turǵyn júrgizýshi kýáligin de, aqshasyn da ala almaǵan. Osydan keıin ol polıtsııaǵa júgingen.
Atalǵan derek boıynsha alaıaqtyq belgilerimen sotqa deıingi tergeý júrgizilip jatyr. Polıtsııanyń málimetinshe, aryzdanýshynyń óziniń áreketinen de zań buzýshylyq belgileri anyqtalýy múmkin.
Tergeý barysynda aqshanyń qandaı maqsatpen jáne qandaı jaǵdaıda berilgeni qosa tekserilip, nátıjesinde tıisti quqyqtyq baǵa beriledi.
Polıtsııa júrgizýshi kýáligin zańdy túrde tek belgilengen rásimderden ótip, qajetti emtıhandardy sátti tapsyrǵannan keıin ǵana alýǵa bolatynyn eske saldy.
– Aqshaǵa «máseleni sheship berý», emtıhansyz júrgizýshi kýáligin alyp berý nemese ony belgilengen tártipti aınalyp ótip rásimdeý týraly usynystar kúdik týdyrýy kerek. Ýaqyt únemdeýge nemese emtıhannan jaltarýǵa umtylý aqshadan aıyrylyp qana qoımaı, óziniń zańǵa qaıshy áreketi úshin jaýap berýge ákelýi múmkin, – dep eskertti polıtsııa.
Aıta keteıik, Shyǵys Qazaqstan oblysynda júrgizýshi kýáligin almaq bolǵan er adam alaıaqqa 6,6 mln teńge bergen.
