«Ońaı» tólem júıesi Taldyqorǵanǵa da kelýi múmkin
TALDYQORǴAN. QazAqparat - Almatyda biraz daýǵa qalǵan «Ońaı» tólem júıesi Taldyqorǵanǵa da kelýi múmkin. Qazir atalǵan júıeniń qyr-syry jáne erekshelikterimen jergilikti ákimdik tanysyp jatyr, dep habarlaıdy «QazAqparat» tilshisi.
Alaıda, qoǵamdyq kólikterde engizilýi múmkin elektrondy tólem júıesi taldyqorǵandyqtarǵa asa unamaı otyrǵan syńaıly. Turǵyndar shahardaǵy halyq sany az degendi alǵa tartýda. Sondaı aq olar úshin qolma-qol esep jasasý qolaıly kórinedi.
Al, jergilikti ákimdik atalǵan tólem túriniń basty maqsaty - jolaýshylar tasymaly salasyndaǵy barmaq basty, kóz qysty áreketterdiń aldyn alý, tasymaldaýshylarǵa memleketten beriletin qarajatty tıimdi qadaǵalaý jáne salyqtyq túsimderdiń ashyqtyǵyn qamtamassyz etý degendi aıtady.
«Dál osy baǵytta óz qyzmetin usynyp júrgen kompanııalar kóp. Aldaǵy ýaqytta olardyń barlyǵyn osynda shaqyryp, qyzmetterimen tereńirek tanysatyn bolamyz. Sapalysyn, tıimdisin anyqtap, sol kompanııamen jumys isteý josparda bar» deıdi Taldyqorǵannyń Jolaýshylar tasymalyn basqarý ortalyǵynyń dırektory Danııar Qanaev.
Aıta ketý kerek, eki mıllıonǵa jýyq halqy bar Almaty qalasynda atalǵan tólem túri engizilgende halyq narazylyǵyn týdyrǵan bolatyn. Arnaıy tólem kartasyz aqshasyn tóleı almaǵan jolaýshylar biraz ábigerge tústi. Jańashyldyqty jaqtyrtpady. Jańa júıeni birden meńgere almaı qınaldy. Taldyqorǵandyqtar bolsa, atalǵan júıe engizilmeı jatyp, ázirden áleýmettik jelige qarsy pikirlerin bildirip jatyr. Al shahar boıynsha halyq sany 167 myńnan asady. Halyqty tasymaldaıtyn 240 avtobýs bar.
