«Ońaı» bank kartalarymen básekege túspek
ALMATY. QazAqparat - Almatyda qoǵamdyq kóliktegi «Ońaı» tólem kartasy jaqyn arada bank kartasymen básekege túsedi, dep habarlaıdy QazAqparat tilshisi.
Almaty kólik holdınginde «Ońaı» kartasynyń bolashaǵy týraly aıtyldy.
«Búginde biz AppStore men Google Playde mobıldi qosymsha ashtyq. Bul «Ońaıdy» tek jolaqysynyń tólem kartasy emes, taýarlar men qyzmetterdiń aqysyn tóleý quralyna aınaldyrý strategııasynyń alǵashqy qadamy. Biz kezeń-kezeńimen mobıldi qosymshanyń fýnktsııasyn keńeıte túsemiz», - dedi «Ońaı Raý» JShS dırektory Aleksandr Zaıkın.
Qosymsha arqyly qoldanýshylar kartanyń balansyn tekserip, joǵalǵan kartany blokqa qoıa alady.
Jaqyndarynyń kartalaryn tirkep, eń tıimdi baǵytty belgileı alady. Sonymen qatar, endi karta joǵalsa, ony tez arada buǵattaý múmkindigi týdy.
Eń bastysy tutynýshylardyń jeke málimetteriniń qupııalyǵyn saqtaý qıyndyq týǵyzady.
Sebebi, qosymsha qujat nómiri, adamnyń aty-jóni de tirkeledi.
«Jeke kýáliktiń málimetteri tek qana karta ıesiniń jeke basyn kýálandyrý úshin ǵana qajet. «Ońaı» mobıldi qosymshasyndaǵy jeke málimetter halyqaralyq qorǵaý júıesimen qorǵalǵan. Osyǵan deıin qansha adam aqshasy joǵalǵanyn jarııalaǵan bolatyn. Alaıda teksere kele bir de bir derek rastalmady», - dedi A.Zaıkın.
Aıta ketý kerek, Almatyda tamyzdyń 1-inen bastap teńdestirilgen tarıf engizildi. Endi «Ońaı» kartasy joq jolaýshylar bir baǵytqa 150 teńge tóleıdi.
