Ońaı aqsha tappaq bolǵan Petropavl turǵyny 19 mln teńgesinen aıyryldy

PETROPAVL. KAZINFORM – Soltústik Qazaqstan oblysynda bes aı ishinde 27 turǵyn aqshasyn «ınvestıtsııaǵa» salyp, alaıaqtarǵa aldandy.

SQO polıtsııa departamenti baspasóz qyzmetiniń málimetinshe, «aqshany kóbeıtý», «ınvestıtsııa» jáne tez tabys tabýdy ýáde etetin ózge de ınternet-alaıaqtyq shemalar sońǵy kezde beleń alǵan.

- Áleýmettik jelilerde jeńil jolmen tabys tabý týraly jarnamalar jıi kezdesedi. Jarnamadaǵy siltemege ótken soń, alaıaqtar WhatsApp arqyly habarlasyp, ózderin ınvestıtsııalyq nemese keńes berý kompanııasynyń qyzmetkerleri retinde tanystyrady, «bolashaǵy zor bırjalyq mámilelerge» aqsha salýdy usynady.

Jábirlenýshi arnaıy ınternet-resýrsta tirkelip, «jeke kabıneti» arqyly tabysynyń óskenin kóredi. Shyn máninde onyń eshqandaı mańyzy joq, alaıda keı adamdar úlken nesıe alady, tanystarynan qaryz suraıdy, - deıdi polıtsııa qyzmetkerleri.

Máselen Petropavl turǵyny «bırjalyq oıyndarǵa» 19 mln teńge aýdarǵan. Dollarmen eseptelgen «tabysy» únemi ósip otyrǵan, biraq ol aqshasyn almaq bolǵanda, alaıaqtar baılanysqa shyqpaı qoıǵan.

Polıtseıler ınternet pen áleýmettik jeli qoldanýshylarynyń «jeńil tabys tabý» týraly ýádege senbeýge jáne beıtanys adamdarǵa aqsha aýdarmaýǵa shaqyrady.

Buǵan deıin SQO-da ara shaqqan er adam ólim aýzynan qalǵanyn jazǵan edik.