Ońaltý josparymen qamtylǵan kompanııaǵa qatysty shekteýler birden joıylady
NUR-SULTAN. QazAqparat - Jańa zań jobasy aıasynda ońaltý jáne bankrottyq rásimderine kirý jeńildetiledi.
Bul týraly Parlament Májilisiniń jalpy otyrysynda ońaltý jáne bankrottyq rásimderin jetildirý týraly zań jobasyn talqylaý kezinde QR Qarjy birinshi vıtse-mınıstri Berik Sholpanqulov málim etti, dep habarlaıdy QazAqparat tilshisi.
«Birinshiden, ońaltý jáne bankrottyq rásimderin qoldaný úshin sharttardy jeńildetý eskerilgen. Zań jobasy úsh aıdan astam oryndalmaǵan mindettemeleri jáne oń balansy bolǵan kezde ońaltý rásimin qoldaný usynylady. Óz kezeginde eger ótinish bergen kúni sýbekti dármensizdiginiń kýási retinde teris balans faktisi anyqtalatyn bolsa, sot kásiporyndy bankrot dep jarııalaı alady. Osylaısha, belgisizdik joıylyp, ońaltý jáne bankrottyq rásimderine kirý jeńildetiledi», - dedi ol.
B. Sholpanqulovtyń sózine qaraǵanda, zań jobasy qazir tek bankrottyqqa bara alatyn jeke kásipkerlerdiń ońaltylýyna múmkindik beredi. Tájirıbede basqa da problemalar bar. Mysaly, ońaltý josparyn bekitý - kompanııanyń kúndelikti jumysynyń jalǵasýyna kepildik bermeıdi.
«Shottarǵa jáne múlikterge salynǵan shekteýlerdi alý týraly tikeleı norma joq. Zań jobasynda sot ońaltý josparyn bekitken kezden bastap, shottar men múlikterden barlyq shekteýlerdi alý usynylady», - dedi birinshi vıtse-mınıstr.
Eske sala keteıik, jaqynda QR Prezıdenti Qasym-Jomart Toqaev Qazaqstanda kásiporyndar men kompanııalardy saýyqtyrý men bankrottyǵy talaptaryn túbegeıli jeńildetý jáne rásimder merzimin qysqartý kerektigin tapsyrǵan bolatyn.
