«On jyldan keıin bárimiz otandyq kıim kıemiz» - baspasózge sholý
***
«Egemen Qazaqstan» gazetiniń jazýynsha, Elordadaǵy 2 759 oqýshy bilim alyp jatqan, onyń 770-i ozattar qatarynan kóringen №64 mektep-lıtseıdegi sońǵy qońyraý soǵý saltanatyna Bilim jáne ǵylym mınıstri Aslan Sárinjipov qatysyp, bul ár jyl saıyn qaıtalanyp otyratyn aıtýly kúnniń ereksheligine toqtaldy. Ol bıyl elimizdegi 7 563 mektepte 2,6 mıllıon oqýshy bilim alǵanyn alǵa tartyp, 124 myń túlek mektep bitiretinin, olardyń 84 302-si qazaq tilinde, 40 077-si orys tilinde oqyp, ómirge qanat qaqqaly otyrǵanyn atap aıtty. Ústimizdegi jyly mektep bitirýshilerdiń 87 770-si UBT-ǵa qatysýǵa tilek bildiripti. Bul kórsetkish jalpy bitirýshilerdiń 71 paıyzyn quraıdy eken. Osy talapkerlerdiń 62 384 qazaq tilinde, 25 398-i orys tilindegi mektep bitirýshiler eken. «Altyn belgige» úmitkerler 4 498 bolsa, onyń 188-i Astana qalasynan kórinedi. Bul maqala «Shýaqty mamyr kúni estildi kúmis qońyraý úni» degen taqyryppen berilgen.
Bas basylymda «Dıplomattarmen dıdarlasty» degen maqala kópshilik nazaryna usynylyp otyr. Keshe Parlament Senatynyń Tóraǵasy Qasym-Jomart Toqaev Irannyń Qazaqstandaǵy elshisi Modjtaba Damırchılýdy onyń ótinishi boıynsha qabyldady, dep habarlady Senattyń baspasóz qyzmeti. Senat Tóraǵasy M.Damırchılýdyń Qazaqstandaǵy dıplomatııalyq mıssııasy tabysty bolatynyna jáne eki el arasyndaǵy ózara tıimdi yntymaqtastyqty damytýǵa jańa serpin beretinine senim bildirdi. M.Damırchılý taıaýdaǵy saılaýda Prezıdent N.Nazarbaevtyń aıqyn jeńisine Iranda yqylaspen nazar aýdaryp otyrǵanyn atap ótti: «Prezıdenttik saılaýdyń nátıjeleri halyqtyń óz Prezıdentine shynaıy senimin pash etti. Qazaqstan Ortalyq Azııa aımaǵyndaǵy kóshbasshy bolǵandyqtan, halyqtyń bul tańdaýy Qazaqstannyń ǵana emes, búkil aımaqtyń turaqty damýyn qamtamasyz etedi», - dedi ol. Elshi Q.Toqaevty Qazaqstan Prezıdenti N.Nazarbaevtyń aldaǵy Iranǵa resmı saparyna ázirlik týraly habardar etti. Senat Tóraǵasy Memleket basshysynyń sapary eki eldiń túrli saladaǵy yntymaqtastyǵyn damytýǵa zor serpin beretini týraly pikirin bildirdi.
Budan bólek, Senat Tóraǵasymen kezdesýi barysynda Chehııanyń Qazaqstandaǵy elshisi Elıshka Jıgova Qazaqstannyń áleýmettik-ekonomıkalyq saladaǵy eleýli jetistikterine toqtaldy. Q.Toqaev cheh dıplomatyn «bes ınstıtýttyq reformany iske asyrý jónindegi 100 naqty qadam» baǵdarlamasy men «Nurly jol» jańa ekonomıkalyq baǵytynyń negizgi máseleleri týraly habardar ete kelip, osy baǵdarlamalarǵa baılanysty sheteldik ınvestorlarǵa ashylatyn zor múmkindikterdi atap ótti. Senat basshysy Astanada aǵylshyn quqyqtary qaǵıdalaryna negizdelgen, jeńildetilgen salyq tártibi men táýelsiz qarjy sotyna ıe halyqaralyq qarjy ortalyǵyn qurý josparlaryna Chehııa elshisiniń nazaryn aýdardy.
***
«Aıqyn» gazetinde «Dıodty shamdar shyǵarylatyn bolady» degen materıal jarııalandy. Qyzylorda oblysynda alǵash ret Jalaǵash aýdanynda shaǵyn jáne orta bıznesti damytý maqsatynda jaryq dıodty shamdar shyǵaratyn jańa óndiris kásiporny ashylady.
«Qazenergııa únemdeý» seriktestiginiń qoldaýymen iske qosylǵaly jatqan zaýyt jylyna 31,2 myń dana jaryq dıodty sham shyǵarmaqshy. Indýstrııalandyrý kartasy aıasynda júzege asyrylyp otyrǵan jobanyń quny 98,3 mln teńgeni quraıdy. Kásiporyn úshin aýdandyq ındýstrııaldy aımaqtan jer telimi bólindi. Búginde óndiris oshaǵynyń qurylysy aıaqtalyp, ishki-syrtqy árleý jumystary júrip jatyr. Kásiporyn reseılik jabdyqpen jaraqtandyrylatyn bolady. Óńirde qolǵa alynyp otyrǵan jaryq dıodty shamdar jasaý jobasy qazirgi naryq jaǵdaıynda óte ózekti. Atalǵan kásiporynnyń ónimi qýat kózin únemdeýge múmkindik beredi. Zaýyt ónimin barlyq turǵyn úı, nysandarǵa, ǵımarattar men dala jaryqtaryna paıdalanýǵa bolady.
Osy basylymda «On jyldan keıin bárimiz otandyq kıim kıemiz» atty maqala basyldy. Tórt júz mıllıard teńge! Eger otandyq jeńil ónerkásip otandyq naryqty tolyq ıgerse, jyl saıyn osynsha mol tabys taba alady. Bul týraly keshe «Qazaqstanda jeńil ónerkásipti damytý» taqyrybynda ótken «Úkimet saǵatynda» Májilis tóraǵasynyń orynbasary, «Nur Otan» partııasy fraktsııasynyń jetekshisi Darıǵa Nazarbaeva málim etti.
***
«Ana tili» gazetiniń tilshisi qazaq tsırkiniń búgingi jaıy jóninde oı qozǵap, «Qazaq tsırki qandaı kedergilerge tap bolyp otyr?» («Ana tili» gazeti, №6 (1264), 12-18 aqpan, 2015 jyl) degen taqyrypta maqala jazǵan edi. Osyǵan oraı QR Mádenıet jáne sport mınıstrliginiń vıtse-mınıstri Ǵ.Ahmedıarovtan jaýap keldi. Onda bylaı delinedi:
«Qazaq tsırki óz mektebin qalyptastyrǵan kıeli óner ordasy. Elimizdi álemge tanytatyn, ulttyq ereksheligimiz kórinis tapqan osyndaı kıeli óner ordalary bizdiń elimizdiń Qaraǵandy, Astana, Shymkent, Almaty qalalarynda bar. Atalǵan tsırkter jergilikti atqarýshy organdarǵa baǵynysty bolǵandyqtan, qoldanystaǵy zańnamaǵa sáıkes olardyń qyzmeti men qarjylandyrý máselesi ákimdikterdiń quzyrynda ekendigin qaperge salamyz. Qazaq tsırkine baılanysty jazylǵan maqalada kóterilgen birqatar máselelerdiń oryndy ekendigin aıta ketken jón. Bul baǵytta memleket tarapynan birqatar sharalar atqarylyp jatqanyn málimdeımiz»,-dep atap ótilgen. Osy jaıynda « Qazaq tsırki qaltarysta qalmaıtyn boldy» degen maqalada egjeı-tegjeıli jazylǵan.
