On jylda Qazaqstanda týberkýlezge shaldyǵýdyń kórsetkishi eki eseden astam tómendedi - professor T.Ábildaev
Bul týraly búgin Astanada Ortalyq Azııa elderiniń eńbekshi mıgranttar arasynda týberkýlezge qarsy kúres júrgizý jónindegi aımaqtyq yntymaqtastyǵyna arnalǵan baspasóz máslıhatynda QR DSÁDM Týberkýlez máseleleri jónindegi ulttyq ortalyǵynyń dırektory, professor Tileýhan Ábildaev málim etti.
«Týberkýlezge qarsy kúres baǵdarlamasy Qazaqstanda tıimdi nátıjeler berýde. Buny tek qazaqstandyqtardyń ǵana baǵasy emes, sonymen qatar Dúnıejúzilik densaýlyq saqtaý uıymynyń da sarapshylary elimizde júrgizilip jatqan keshendi sharalarǵa oń baǵalaryn berip otyr. Sebebi, búginde týberkýlezdi anyqtaýǵa jáne ony der kezinde nátıjeli emdeýge kóptegen múmkindikter jasalǵan»,-dedi T. Ábildaev.
Onyń paıymynsha, syrttan kelip jatqan eńbek mıgranttary týberkýlez aýrýyna baılanysty ahýalǵa óziniń áserin tıgizýi múmkin.
Atap aıtqanda, Dúnıejúzilik densaýlyq saqtaý uıymynyń sońǵy derekterine sáıkes, jyl saıyn álem boıynsha 8,6 mıllıonǵa jýyq adam týberkýlezge shaldyǵady, olardyń 1,3 mıllıony osy keseldiń saldarynan kóz jumady. Týyndap otyrǵan qazirgi máselelerdi eskere otyryp, Qazaqstan úkimeti 2014-2020 jyldarǵa arnalǵan Týberkýlezge qarsy kúresý jónindegi keshendi jospardy qabyldady.
«Týberkýlezdi ınnovatsııalyq tásildermen dıagnostıkalaý jáne halyqaralyq standarttarǵa sáıkes emdeýdiń arqasynda sońǵy on jyl ishinde elimizde osy aýrýǵa shaldyǵýdyń kórsetkishi eki esege astam, al ólim-jitim 73 paıyzǵa derlik tómendedi», - dep atap ótti Tileýhan Ábildaev.
QR Densaýlyq saqtaý jáne áleýmettik damý mınıstrliginiń (QR DSÁDM) málimetine qaraǵanda, sońǵy 6 jyl ishinde elimizde týberkýlezge shaldyǵý kórsetkishi 1,6 esege, al onyń saldarynan oryn alatyn ólim-jitim 2,6 esege tómendegen. Alaıda áli kúnge sheıin erekshe qaýip-qater tobyna eńbekshi mıgranttar kirip otyr. Qazaqstan jyl saıyn 300-den bastap 1 mıllıonǵa deıingi mıgrantty qabyldaı otyryp, Ortalyq Azııa elderine týberkýlezge transshekaralyq baqylaý júrgizýge múmkindik berip otyrǵan kelissóz alańyna aınalyp otyr.
Spıkerler atap ótkendeı, Qazaqstanda kóbinese Ózbekstan,Tájikstan jáne Ázerbaıjan azamattary eńbek etedi. Mıgranttardy qabyldaý jaǵynan Ońtústik Qazaqstan oblysy kósh bastap tur, ekinshi orynda Atyraý oblysy keledi, búkil mıgranttardyń úshten biri Astana men Almaty qalalarynyń úlesine tıesili. Qazaqstan Úkimeti 2014-2020 jyldarǵa arnalǵan Týberkýlezge qarsy kúresý jónindegi keshendi jospardy qabyldaý kezinde osy jaǵdaıdy eskerdi. Atalǵan jospardyń ishinde mıgranttar arasyndaǵy týberkýlezdi aldyn alý jáne emdeý qyzmetterin jaqsartýǵa jáne de aımaqaralyq dıalogty qurýǵa baǵyttalǵan is-sharalar qamtylǵan.