Oń jaqtaǵy róli aýystyrylǵan kólikterdi taksı retinde paıdalanýǵa tyıym salynbaq

ASTANA. KAZINFORM — Qalaaralyq tasymaldaý kezinde júrgizýshilerdiń eńbek etý jáne demalý rejımin baqylaý quraldaryn mindetti túrde qoldanýy engiziledi. Bul týraly Májilis depýtattarynyń saýalyna Premer-mınıstrdiń birinshi orynbasary Roman Sklıardyń jaýabynda aıtylǵan.

— Іshki ister jáne Kólik mınıstrlikteri 2023-2027 jyldarǵa arnalǵan birlesken Jol kartasyn bekitti. 2024 jyly osy karta aıasynda ІІM, KM, «ıAndeks. Taksı» JShS jáne «Inservice» JShS («inDrive») yntymaqtastyq týraly memorandýmdarǵa qol qoıdy, — dedi Roman Sklıar.

Onyń aıtýynsha, qujat oń jaq róldi avtomobılderdiń taksı qyzmetterinen kezeń-kezeńimen alyp tastaýdy, júrgizýshilerdi jol erejelerin saqtaýǵa yntalandyratyn ártúrli júıelerdi engizýdi jáne basqa da máselelerdi qamtıdy. Qazirgi ýaqytta birlesken jumys nátıjesinde róli oń jaqta ornalasqan 70 myńnan astam kólik quralyna ınternet-platformalarǵa qoljetimdilik shekteldi.

— Sonymen qatar, jolaýshylar tasymaly qaýipsizdiginiń deńgeıin arttyrý maqsatynda zańnamalyq túzetýler daıyndaldy, — dedi ol.

Vıtse-premer dereginshe, olar mynalar:

— oń jaqtaǵy róli aýystyrylǵan kólik quraldaryn taksı retinde paıdalanýǵa tyıym salý;
— qalaaralyq tasymaldaý kezinde júrgizýshilerdiń eńbek etý jáne demalý rejımin baqylaý quraldaryn mindetti túrde qoldaný;
— tasymaldaýshylardyń zańnama talaptaryna sáıkestigin baqylaý boıynsha ınternet-agregatorlarynyń mindetterin belgileý;
— taksıdiń aqparattyq-dıspetcherlik qyzmetiniń jumysyna ruqsat berý tártibin engizý.

Aıta keteıik, Almaty men Astanada júrgizýshisiz taksı jobasy iske qosyldy.