On myńnan astam aqtóbeliktiń qarjy pıramıdasyna aqsha salǵany anyqtaldy
AQTÓBE. QazAqparat – Aqtóbede qarjy pıramıdasyna qatysty tergeý júrip jatyr. Qazir 10 myńnan astam adamnyń aqsha salǵany anyqtaldy, dep habarlaıdy QazAqparat tilshisi.
Aqtóbe oblystyq polıtsııa departamenti «Gold» qarjy pıramıdasyna aqsha aýdaryp, paıdaǵa kenelmek bolǵandardyń tizimin jasap jatyr. Qazir sot aldy tergeý jumystary bastaldy.
«Qazirgi ýaqytta 10 myńnan astam salymshy anyqtaldy. Olardyń shyǵyny eseptelip jatyr. «Gold» JShS-men arada kelisimshart bar. Zergerlik buıymdardy baǵalaý, zergerlik buıymdardy satý men servıstik qyzmet týraly ǵana jazylǵan. Buǵan deıin birneshe ret BAQ arqyly beımálim uıymdarǵa qarjy salmaý, saq bolý týraly eskertip, habarlama bergen bolatynbyz. Ári áleýmettik jeline taratqan aqparattarǵa senýge bolmaıdy», - dedi Aqtóbe oblystyq polıtsııa departamenti bastyǵynyń orynbasary Samat Aısov.
Aqtóbelik salymshylar seriktestik ǵımaratyna baryp, polıtsııa qyzmetkerlerimen kezdesti.
«Kóbi alǵashqy kezeńde eskertip, habarlama berý kerek edi dep ýáj aıtty. Kompanııa jumysyn toqtatpas buryn Ulttyq bank, memlekettik kirister organdaryna suranys jiberip, qarjylyq qyzmeti týraly bilýimiz kerek. Teksere kele, Reseı azamattarynyń eshqandaı esepshoty joq ekenin bildik. Býhgalterlik esep júrgizilmegen. Basshylary keshkilik kelip, seıften aqsha alyp otyrǵan. Bary osy», - dedi Samat Aısov.
Eske salsaq, osy oqıǵa boıynsha Qylmystyq kodekstiń 217-baby, ıaǵnı, «Qarjy (ınvestıtsııalyq) pıramıdasyn qurý jáne basqarý» boıynsha qylmystyq isti tergeý sheńberinde uıym keńsesinde tintý júrgizildi. Qujattama, kompıýterlik tehnıka tárkilendi.
