On mln teńge paramen ustalǵan Sátbaev ákimi 3,5 jylǵa sottaldy

SÁTBAEV. KAZINFORM - Sátbaev soty qalanyń eks-ákimi Shapaǵat Áýbákirge qatysty qylmystyq isti qarady. Tergeý organy burynǵy sheneýnikti asa iri mólsherde para aldy dep aıyptaǵan. 

Tergeý nátıjesinde 2024 jyldyń aqpan aıynda Shapaǵat Áýbákir qala ákimi bola tura Sátbaev qalasyndaǵy joldardy kútip ustaý jumysyn júrgizetin jeke kásipkerden memlekettik satyp alý shartynyń somasyn ulǵaıtýǵa jáne ony keńeıtýge járdemi úshin 10 mln teńge kóleminde para alǵany anyqtaldy. 

Sottalýshylar kinásin moıyndady.

Prokýror sottan aıyptalýshylarǵa memlekettik qyzmette laýazym atqarý quqyǵynan ómir boıyna aıyra otyryp, 3 jyl 6 aıǵa bas bostandyǵynan aıyrýdy surady.

Sottalýshylar bas bostandyǵynan aıyrmaıtyn jaza taǵaıyndaýdy surady.

«Jaza taǵaıyndaý kezinde sottalýshylardyń kinásin moıyndaýy, shyn júrekten ókingeni jáne jas balalardyń bolýyn qylmystyq jaýapkershilik pen jazany jeńildetetin mán-jaı dep tanyldy. Eks-ákimniń qabyldaǵan antyn buzýy onyń jaýapkershiligi men jazasyn aýyrlatatyn mán-jaı dep tanyldy. Sot úkimimen ol QK 366-babynyń 2-bóligimen kináli dep tanylyp, oǵan memlekettik qyzmette laýazymdardy atqarý quqyǵynan ómir boıyna aıyra otyryp, 3 jyl 6 aıǵa bas bostandyǵynan aıyryldy. M. QR QK 367 babynyń 2 bóligimen kináli dep tanylyp, oǵan memlekettik qyzmette laýazym atqarý quqyǵynan ómir boıyna aıyra otyryp, paranyń jıyrma eselengen somasy — 200 mln teńge aıyppul taǵaıyndaldy», — dep málim etti Sátbaev qalalyq soty.

Sátbaev qalasy ákimdigine qatysty bólinetin bıýdjet qarjysynyń negizdiligin, qarjylandyrý josparynyń jáne maqsatty paıdalanýyn qaıta qarap, únemdi paıdalanýynyń tıisti sharalaryn júrgizý úshin jeke qaýly shyǵaryldy.

Úkim zańdy kúshine engen joq.

Eske salsaq, 14 aqpanda Antıkor Sátbaev qalasynyń ákimi Shapaǵat Áýbákir 10 mln teńge kóleminde para alǵany úshin ustalǵanyn habarlaǵan bolatyn.  

7 naýryzda Sátbaev ákiminiń isi sotqa jetti.