On myń teńge úshin sottaldy: prokýratýra dropperlik úshin jaýapkershilik baryn eskertti
QOSTANAI. KAZINFORM- Qostanaı oblysy Beıimbet Maılın aýdanynyń turǵyny ońaı jolmen aqsha tabý úshin 10 myń teńgege banktik shotyn alaıaqtarǵa bergen. Nátıjesinde onyń shoty qylmystyq shemaǵa paıdalanylyp, ózi qylmystyq jaýaptylyqqa tartyldy.
Qostanaı oblysy prokýratýrasynyń habarlaýynsha, sot ony Qazaqstan Respýblıkasy Qylmystyq kodeksiniń 232-1-babynyń 4-bóligi boıynsha kináli dep tanydy. Oǵan 1 jylǵa probatsııalyq baqylaý belgilenip, bas bostandyǵyn shekteý jazasy taǵaıyndaldy.
Osyndaı quqyq buzýshylyqtardyń aldyn alý maqsatynda aýdan prokýratýrasynyń bastamasymen sot protsesi jergilikti turǵyndardyń qatysýymen ashyq formatta ótti. Jıynda naqty mysal arqyly ońaı tabys tabýǵa umtylýdyń qylmystyq jaýaptylyqqa ákelýi múmkin ekeni túsindirildi.
Prokýratýranyń málimetinshe, dropperler – ózderiniń banktik shottaryn nemese kartalaryn aqsha úshin bógde adamdarǵa beretin azamattar. Olar qylmystyq jolmen alynǵan qarajatty aýdarýǵa nemese qolma-qol aqshaǵa aınaldyrýǵa da kómektesýi múmkin.
Azamat qylmysty uıymdastyrmaǵan jaǵdaıda da, mundaı áreketi úshin qylmystyq jaýapqa tartylýy yqtımal.
-Dropperlik úshin zańnamada aıyppuldan bastap 7 jylǵa deıin bas bostandyǵynan aıyrýǵa deıingi jaza kózdelgen. Prokýratýra azamattardy banktik kartalaryn, shottaryn, SMS-kodtaryn jáne jeke derekterin bógde adamdarǵa bermeýge shaqyrdy. Jeńil jolmen aqsha tabýǵa umtylý sottylyqqa jáne ózge de aýyr quqyqtyq saldarǵa ákelýi múmkin. Eger azamat ózin zańsyz shemaǵa tartqanyn túsinse, dereý quqyq qorǵaý organdaryna habarlasýy qajet,-delingen habarlamada.
Osyǵan deıin droperlik áreketterge qatysty ishki ister mınıstrligi de turǵyndarǵa eskertý jasaǵan bolatyn.
