On mańyzdy baǵyt: Qyzylorda óńirinde aldaǵy 4 jylda 3510 páter paıdalanýǵa berilmek
Memleket basshysy Qasym-Jomart Toqaev ulyqtaý rásiminde aldaǵy ýaqyttaǵy on mańyzdy baǵyttyń biri retinde turǵyn úı máselesin sheshýdi atap kórsetken bolatyn.
«Túrli sanattaǵy azamattardyń qoljetimdi baspanaǵa ıe bolýyna aıryqsha nazar aýdaramyn», - dedi Memleket basshysy.
Bul baǵytta Syr óńirinde aýqymdy ister atqarylǵan. Byltyr Qyzylorda oblysynda kóp qabatty 70 turǵyn úı qurylysy júrgizildi. Onda barlyǵy 1790 páter bar. Nátıjesinde 1222 páterdi qamtıtyn kóp qabatty 56 turǵyn úı eldiń ıgiligine aınaldy. Byltyr satyp alý quqyǵynsyz jalǵa beriletin turǵyn úı qurylysyn júrgizýge bólingen 4,3 mlrd teńge qarjy tolyǵymen ıgerildi. Oǵan 620 páterli kóp qabatty 17 úıdiń qurylysy júrgizildi. Jyl sońyna deıin 292 páterlik kóp qabatty 7 turǵyn úıde otbasylar qonys toıyn toılady.
Syr óńirinde nesıelik turǵyn úı baǵytynda da is qarqyndy júrip jatyr. Bul baǵytta Qyzylorda qalasyndaǵy darııanyń sol jaǵalaýynda kóp qabatty turǵyn úıler boı kóterdi. Olardyń jalpy sany 4 turǵyn úıdi quraıdy. Bul maqsatta 2,1 mlrd teńge bólingen. Ol úılerde qonys toıy jaqyn kúnderde toılanady dep josparlanyp otyr.
2018 jyl qorytyndysymen Syr óńirinde 699,6 myń sharshy metr turǵyn úı paıdalanýǵa berildi. Ol aldyńǵy jylmen salystyrǵanda 14,3 paıyzǵa artyq.
Taǵy bir aıta keterligi, jańa aýmaqtarǵa jetkiziletin ınjenerlik-kommýnıkatsııalyq ınfraqurylym jumystary boıynsha da júıeli ister atqaryldy. Bul baǵytta 50 jobany iske asyrýǵa qaralǵan 7,9 mlrd teńge tolyǵymen ıgerildi. Nátıjesinde Qyzylorda oblysynda 473,2 myń shaqyrym ınjenerlik ınfraqurylym jelileri el ıgiligine aınaldy.
Aımaqta turǵyn úı máselesin sheshý maqsatynda «Qyzylorda oblysyn áleýmettik-ekonomıkalyq damytýdyń 2019-2022 jyldarǵa arnalǵan keshendi jospary» ázirlengen. Aldaǵy 4 jylda aımaqta aýmaǵy 208,9 myń sharshy metrdi quraıtyn 3510 páter paıdalanýǵa berilmek. Olardyń ishinde 1205-i halyqtyń áleýmettik osal toptaryna, 1715-i kópbalaly otbasylarǵa beriledi. Al 590-y nesıelik turǵyn úı esebinde turǵyndarǵa tabys etiledi. Atalmysh turǵyn úılerdi qamtamasyz etý maqsatynda 37,9 shaqyrym ınjenerlik jeliler tartylady.
«Keshendi jospardaǵy turǵyn úı qurylysyn júrgizýde jalǵa beriletin turǵyn úı qurylysynyń birinshi baǵyty - halyqtyń áleýmettik jaǵynan osal toptaryna arnalǵan. Osy maqsatta respýblıkalyq bıýdjetten 2019 jylǵa 2 mlrd teńgeden astam qarjy qaralǵan. Ekinshi baǵyty boıynsha kópbalaly analardy turǵyn úımen qamtamasyz etý máselesi eskeriledi. Oǵan 3 mlrd teńgeden astam qarjy qaralǵan. Úshinshi baǵytynda ınjenerlik júıelerdi júrgizý máselesi oılastyrylǵan», - dedi Qyzylorda oblystyq qurylys, sáýlet jáne qala qurylysy basqarmasy basshysynyń orynbasary Ardaq Nurmaǵambetov.
Aıta keterligi, jýyrda ındýstrııa jáne ınfraqurylymdyq damý mınıstrliginde turǵyn úıdi paıdalanýǵa berý jóninen kóshbasshy oblystar ataldy. Olardyń qatarynda Qyzylorda oblysy da bar.
Budan buryn Syr óńiri aýyldarynyń 83 paıyzy aýyz sýmen qamtylǵanyn jazǵan edik.