On mańyzdy baǵyt: Aqtóbede 19 myńnan astam jumys orny ashylady

Prezıdent Qasym -Jomart Toqaev ultyqtaý rásiminde on mańyzdy baǵytty atady. Tórtinshi baǵytta jańa jumys oryndaryn ashý jáne halyqty laıyqty jalaqymen qamtý mindetteldi.

«Bıyl 19542 jumys ornyn qurý josparlanýda. Onyń ishinde memlekettik jáne úkimettik baǵdarlamalardy júzege asyrý kezinde 18112 adamǵa jumys tabylady. Ásirese 6 myńǵa jýyǵy turaqty jumys orny bolmaq. Bilim jáne ǵylymdy damý, Indýstrıaldyq-ınnovatsııalyq damý, Óńirlik damý baǵdarlamalaryna basymdyq berildi. Al «Tsıfrlyq Qazaqstan» baǵdarlamasy aıasynda mamandardy qysqartpaı, olardy qaıta daıarlaý, biliktiligin arttyrý qajet. Qańtar-mamyr aılarynda 8 myńnan astam jumys orny ashylyp, adamdar eńbekke aralasty. Bul jospardyń 43 paıyzyn qurap otyr», - dep habarlady oblys ákiminiń baspasóz qymzeti.

«Nátıjeli jumyspen qamtý jáne jappaı kásipkerlikti damytý» baǵdarlamasy aıasynda «Bastaý bıznes» jobasymen bıyl 1 myńnan astam adam tegin oqıdy. Ol úshin 88 mıllıon teńgeden astam qarjy qarastyrylǵan. Aqtóbe oblysynyń jumyspen qamtýdy úılestirý jáne áleýmettik baǵdarlamalar basqarmasynyń bólim basshysy Jánibek Naǵmetqalıevtiń aıtýynsha, aýyl men shaǵyn qalalar úshin shaǵyn nesıe berýge bıýdjetten 3,8 mıllıard teńge bólindi. Barlyǵy 976 joba qarjylandyrylady.
«Qalalar men monoqalalarǵa nesıe berýge 1,1 mıllıard teńgeden astam qarjy bólindi. Barlyǵy 119 jobaǵa qoldaý bar. Bul baǵyttaǵy jumysqa oblystyq kásipkerlik basqarmasy jaýapty, al «Bastaý bıznes» jobasy men aýylǵa, shaǵyn qala turǵyndaryna nesıe berýdi aýyl sharýashylyǵy basqarmasy atqarady», - dedi Jánibek Naǵmetqalıev.

Jańa bıznes ıdeıalardy iske asyrýǵa memlekettik granttar beriledi. Qaıtarymsyz aqshany 420 adamǵa berý josparlanǵan. Bul úshin bıyl bıýdjetten 192 mıllıon teńge bólingen.

«Atameken» kásipkerler palatasy, jumyspen qamtý ortalyǵy men kásipker arasynda kelisim bolady. Grant alý kezinde salyq zańnamasyna sáıkes salyq organdarynda tirkeýde turǵan, «Atameken» palatasy komıssııasynan oń sheshim alǵan, buryn grant, ózge de memlekettik baǵdarlamalar aıasynda qarjylaı qoldaý bolmaǵan adamdar tańdalady. Jańa ıdeıalar úshin 100 AEK-ke deıin aqsha beriledi. Ári bıyl Elbasy tapsyrmasymen jastarǵa, az qamtylǵan, múgedek bala asyrap otyrǵan otbasyǵa 200 AEK kóleminde deıin aqsha beriledi», - dedi Jánibek Naǵmetqalıev.

«Nátıjeli jumyspen qamtýdy jáne jappaı kásipkerlikti damytý» baǵdarlamasy aıasynda 2017 jyly 2,2 mıllıard teńge, 2018 jyly 3,8 mıllıard teńge bólinip, ıgerildi. Bıyl da 976 jobaǵa 3,8 mıllıard teńge beriledi. Sáýir aıynda qarjy respýblıkalyq bıýdjetten tústi. Qarjy Aýyl sharýashylyǵyn qarjylaı qoldaý qory jáne Agrarlyq nesıe korporatsııasyna bólindi.

Aqtóbe oblystyq aýyl sharýashylyǵy basqarmasy basshysynyń orynbasary Nurjaý Turǵambekovtyń aıtýynsha, qazirgi ýaqytta nesıe alýǵa túsken ótinishter maquldanyp jatyr.

«Mamyr aıynda alǵashqy nesıe berildi. Temir, Shalqar, Muǵaljar, Qobda men Mártók aýdandarynyń kásipkerleri qarjynyń basym bóligin alyp otyr. Aýyl sharýashylyǵyn qarjylaı qoldaý qory saýdadan ózge baǵytqa nesıe beredi. Basymdyq - aýyl sharýashylyǵynda. «Nátıjeli jumyspen qamtýdy jáne jappaı kásipkerlikti damytý» baǵdarlamasy aıasynda nesıe 6 paıyzben 5 jylǵa beriledi. Eger mal sharýashylyǵyna berilse, 7 jyl tóleıdi. Máselen, «Igilik» baǵdarlamasy boıynsha tórt túlik satyp alatyndarǵa tek 4 mıllıon teńgege deıin aqsha beriledi. «Kásipker» baǵdarlamasy aıasynda kempıng, kafe, naýbaıhana sekildi bıznesti qolǵa alsa 6 mıllıon teńgege deıin nesıe usynylady. «Eginjaı» baǵdarlamasy boıynsha 6 mıllıon teńgege deıin aýdarylady. Tehnıkany jóndeý, tuqym satyp alý, tyńaıtqyshtar alýǵa bolady. «Sybaǵa» baǵdarlamasy boıynsha iri qarany shetelden alý kerek. Bul baǵytta kásipkerler 12 mıllıon teńgege deıin nesıe ala alady. Al usaq maldy tek Qazaqstannan alýǵa ruqsat bar», - dedi «Aýyl sharýashylyǵyn qarjylaı qoldaý qory» AQ Aqtóbe fılıalynyń dırektory Gúljanat Erǵazına.