On-laın rejıminde jańa týǵan balanyń Jeke sáıkestendirý nómirin alýǵa bolady
ASTANA. 17 qańtar. QazAqparat - 2012 jyldyń 1 qańtarynan bastap «elektrondyq úkimet» www.egov.kz. portalynda jańa týǵan balany tirkeýden ótkizýge ótinim berýge arnalǵan memlekettik elektrondyq qyzmet iske qosyldy.
Bul óz kezeginde on-laın rejıminde jańa týǵan balanyń Jeke sáıkestendirý nómirin (JSN) alýǵa múmkindik beredi.
Ádilet mınıstrliginiń remı saıtynyń málimetine qaraǵanda, atalǵan qyzmet ázirge elorda turǵyndaryna ǵana qoljetimdi. Sebebi, tek Astana qalasy boıynsha densaýlyq saqtaý organdary dúnıege kelgen balalar týraly málimetterdi on-laın tártibinde Ádilet mınıstrliginiń aqparattyq júıesine baǵyttaıdy.
Elektrondyq qyzmet nekeleri 2008 jyldyń 1 maýsymynan keıin tirkelgen Qazaqstan azamattaryna taralady. Óıtkeni, bul aqparattyq júıe neke týraly málimetterdi atalǵan merzimnen bastap qana qamtyp otyr.
Qaǵaz muraǵattyń elektrondyq kóshirmesin jasaýdy aıaqtaǵannan soń, ıaǵnı 2015 jyldan bastap nekeni tirkeý merzimine qaramastan osy qyzmet túri elimizdiń barsha azamattaryna qoljetimdi bolýy úshin tıisti sharalar iske asyrylýda.
Atap aıtqanda, elektrondyq portalda balanyń týǵanyn tirkeý týraly ótinim berý barysynda ata-analarynyń bireýiniń JSN-nin engizip, ótinimge sandyq túrde qol qoıý kerek. Málimetter durys engizilgen jaǵdaıda balaǵa JSN berilgeni jaıynda, sondaı-aq týý týraly kýálikti alatyn mekemeniń meken-jaıy jónindegi aqparat shyǵady.
