On eki kún boıy izdeýde bolǵan Qosshy turǵyny astanadan tabyldy
KÓKShETAÝ. QazAqparat - Aqmola oblysynda on eki kún boıy izdeýde bolǵan Qosshy turǵyny, 38 jastaǵy áıel Nur-Sultan qalasynan tabyldy, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
«Bıylǵy jylǵy qazannyń 31-de saǵat 15:05 shamasynda Tselınograd aýdandyq polıtsııa bóliminiń krımınaldyq polıtsııa qyzmetkerleri osydan on eki kún buryn joǵalǵan Qosshy qalasynyń 1991 jylǵy turǵyny Sandýǵash Taýbaıqyzy Bekishovany Nur-Sultan qalasynyń jeke sektorynda ornalasqan úılerdiń birinen tapty, onda ol ot jaǵýshy bolyp jumys istegen», - dedi vedomstvodan.
Eske sala ketsek, 2021 jyldyń 20-shy qazanynda Tselınograd aýdanynyń polıtsııa bólimine Qosshy qalasynyń 38 jastaǵy turǵyny ótinishpen júginip, áıelin izdep tabýǵa kómek suraǵan. Er adamnyń ózinshe, 19-shy qazanda áıeli úıinen belgisiz baǵytta ketip qalǵan.
«Іz-túzsiz joǵalǵan adamdy izdeý sharalaryna Aqmola oblystyq Polıtsııa departamentiniń jáne aýmaqtyq bólimsheleriniń jeke quramy baǵyttaldy. Sondaı – aq, jergilikti turǵyndar men eriktiler tartyldy. Olar on eki kún boıy joǵalǵan áıeldi izdedi. Qazir áıel úıinde, onymen profılaktıkalyq áńgime júrgizildi. Onyń ómiri men densaýlyǵyna eshteńe qaýip tóndip turǵan joq», - tolyqtyrdy vedomstvodan.
