On bir aıda Qazaqstan men Ózbekstan arasyndaǵy taýar aınalymy 4,1 mlrd dollarǵa jetti

Qazaqstannyń Saýda jáne ıntegratsııa mınıstri Arman Shaqqalıev Ózbekstannyń Investıtsııalar, ónerkásip jáne saýda mınıstri Lazız Kýdratovpen Tashkentte kezdesip, kelissóz júrgizdi, dep habarlaıdy Kazinform.

Taraptar Qazaqstan Respýblıkasy Prezıdentiniń 2022 jylǵy jeltoqsandaǵy Ózbekstan Respýblıkasyna saparynyń qorytyndysy boıynsha qol qoıylǵan Jol kartasy sheńberindegi, onyń ishinde eki el arasyndaǵy taýar aınalymyn 10 mlrd dollarǵa deıin arttyrý jónindegi ýaǵdalastyqty iske asyrý kezeńderin talqylady.

Kelissóz barysynda Samarqanda Qazaqstan men Ózbekstannyń óńiraralyq yntymaqtastyǵynyń IV Forýmyn ótkizýge erekshe nazar aýdaryldy.

Kezdesý qorytyndysy boıynsha ózara yntymaqtastyqty keńeıtý týraly hattamaǵa qol qoıyldy.

Tashkentke sapary barysynda Arman Shakqalıev«Tehnopark» JShQ óndiristik alańdaryn aralady.

Munda usynylǵan ónerkásiptik kásiporyndar ishki jáne syrtqy naryqtarǵa jetkizý úshin joǵary tehnologııalyq jáne básekege qabiletti ónim shyǵarýǵa baǵyttalǵan.

Esterińizge sala keteıik, Qazaqstan men Ózbekstan arasyndaǵy ekijaqty yntymaqtastyq jónindegi birlesken úkimetaralyq komıssııanyń 20-shy otyrysy aıasynda 2023 jylǵy mamyrda mınıstrlik Tashkentte qazaqstandyq taýar óndirýshiler men qyzmet kórsetýshilerdiń saýda mıssııasyn uıymdastyrdy.

Saýda mıssııasynyń qorytyndysy boıynsha Ózbekstanǵa 44,1 mln. dollardan astam somaǵa qurylys materıaldaryn, kondıterlik ónimderdi, IT qyzmetterdi, sút ónimderin jetkizýge eksporttyq kelisimsharttarǵa qol qoıyldy.

2023 jylǵy jeltoqsanda Qazaqstan-Ózbekstan memlekettik shekarasynda «Ortalyq Azııa — HÓKO» ındýstrııalyq aımaǵy quryldy.

Bul Ózbekstan naryǵyna otandyq ónimniń eksportyn ulǵaıtýǵa múmkindik beredi.

Búgingi tańda Ortalyqty qurý jáne oǵan ınfraqurylym júrgizý boıynsha jumystar atqarylýda.

Ótken jyldyń 11 aıynyń qorytyndysy boıynsha Qazaqstan men Ózbekstan arasyndaǵy taýar aınalymy 4,1 mlrd dollardy qurady.