On bestegi analar: Qazaqstanda jasóspirimder arasyndaǵy júktilik tyıylar emes
ASTANA. KAZINFORM – Qazaqstandyq jasóspirimder orta eseppen 15 jasynan bastap jynystyq qatynasqa túsedi. Bul týraly «AMANAT» partııasy janyndaǵy Otbasy jáne halyqty áleýmettik qorǵaý jónindegi keńes otyrysynda QR Parlament Májilisiniń depýtaty Aına Mysyrálimova málimdedi.
- Qoǵamdyq pikirdi zertteý ınstıtýtynyń saýalnamalary men saraptamalarynyń nátıjesinde Qazaqstanda jasóspirimder orta eseppen 15-19 jas aralyǵynda erte jynystyq qatynasty bastaıtyny anyqtaldy. Qatynasqa túsken jasóspirimderdiń 16,7%-y keminde bir ret júkti bolǵan. Sonyń ishinde – 62%-y bosanǵan, 22%-y – jasandy túsik jasatqan. Jasóspirimderdiń 16%-ynda júktilik ózdiginen túsik tastaýmen aıaqtalǵan, - deıdi keńes jetekshisiniń orynbasary.
Al keńes otyrysyna qatysqan QR Densaýlyq saqtaý mınıstrligine qarasty Medıtsınalyq kómekti uıymdastyrý departamentiniń dırektory sońǵy jyldary erte júktilik deńgeıi aıtarlyqtaı azaıyp kele jatqanyn aıtty.
- 2024 jyldyń qorytyndysy boıynsha 15 pen 18 jas aralyǵyndaǵy jasóspirim qyzdar arasyndaǵy júktilik deńgeıi 11%-ǵa tómendedi. 2023 jyly bul kórsetkish 1000 qyzǵa shaqqanda 4,77 bolsa, 2024 jyly 4,25-ke deıin azaıǵan. Jasóspirimder arasyndaǵy týý kórsetkishi de 8%-ǵa tómendep, 2023 jyly 1000 qyzǵa shaqqanda 3,14 bolsa, 2024 jyly 2,88 bolǵan. Túsik jasatý kórsetkishi de 13,4%-ǵa azaıǵan – 2023 jyly 1000 qyzǵa 0,82, al 2024 jyly 0,71, - deıdi Gúlnár Sársenbaeva.
Alaıda, maman bul kórsetkishterdiń ózi alańdatarlyq jaǵdaı ekenin tilge tıek etti. Sebebi, erte jastan jynystyq qatynasqa túsý qyz balalardyń reprodýktıvti densaýlyǵyna keri áserin tıgizedi eken.
- Búginde elimizde 9,8 mıllıon áıel turady, onyń ishinde 5 mıllıonnan astamy – bala týý jasyndaǵy áıelder. Al 18 jasqa deıingi qyzdardyń sany – 3 mıllıonnan asady. Jasóspirimder arasyndaǵy júktilik – qoǵam úshin asa mańyzdy áleýmettik kórsetkishterdiń biri. Qyz balalardyń reprodýktıvti densaýlyǵyna qazirgi kezeńde erte jynystyq qatynastyń bastalýy, jynystyq jetilýdiń buzylýy, soǵan baılanysty júktilik, bosaný jáne túsik máseleleri keri áserin tıgizýde. Qazaqstanda jasóspirimder arasyndaǵy alǵashqy jynystyq qatynas jasynyń medıanalyq kórsetkishi – 16,5 jas, - deıdi Medıtsınalyq kómekti uıymdastyrý departamentiniń dırektory.
Densaýlyq saqtaý mınıstrliginiń mamany jasóspirimderdiń arasynda júktilikten qorǵaný tásilin biletinder tym az ekenin aıtady.
— Erte jastan júkti bolǵan jasóspirimder kelgende biz medıtsınalyq kómek kórsetip, júktiliktiń sebebin anyqtaımyz. Zorlyq faktisi anyqtalsa, quzyrly organdarǵa habarlaımyz. Mundaı jaǵdaımen aıaǵy aýyr bolyp qalatyn jasóspirimder kóp. Biraq erte jastan júkti bolǵandardyń basym bóligi jynystyq qatynasqa óz erkimen erte túsetinder, – deıdi ol Kazinform tilshisine bergen suhbatynda.
Aıta keteıik, ShQO-da 50 jastaǵy áıelderden júktilik anyqtaldy.