Omyrtqaǵa kúsh túsirmeıtin oqýshy sómkesin qalaı tańdaý kerek
ALMATY. QazAqparat - Almatyda medıtsına mamandary oqýshy sómkesiniń qandaı bolýy kerektigin aıtty, dep habarlaıdy QazAqparat tilshisi.
«Balanyń sómkesin durys tańdaý bolashaqta birqatar aýrýlardyń aldyn alady. Onyń ishinde skolıoz, osteohondroz, kók ettiń jyrtylýy degen sııaqty aýrýlar bar. Sómkeniń arqasy ortopedııalyq ári qatty bolýy tıis. Qatty karkas omyrtqaǵa túsetin júktemeni birkelki etedi. Sonda balanyń omyrtqasyna qatty kúsh túspeıdi», - dedi qalalyq Qoǵamdyq densaýlyqty saqtaý departamentiniń basshysy Aızat Moldaqasymova.
Onyń aıtýynsha, sómkeniń ıyqbaýy birkelki ári ekeý bolýy tıis.
«Mektep sómkesi balanyń jasy men boıyna sáıkes bolǵany abzal. Bastaýysh synyp oqýshylarynyń sómkesiniń salmaǵy 700 grammnan aspaǵany jón. Joǵary jáne orta býyn oqýshylarynyń sómkesi 1 keliden aspaýy kerek. Negizinen sómkelerde jaryq shaǵylystyratyn japsyrmalary bolýy kerek», dedi ol.
Sonymen qatar, maman oqýlyqtar men dápterlerge qoıylatyn talaptar týraly aıtty.
«Qaǵaz súzgi sııaqty ar jaǵyn kórsetpeý tıis. Kitaptaǵy mátinderge de sondaı talap qoıylady. Kitaptardaǵy tańbalar qara tústi, anyq bolady. Oqýlyqtar balanyń oqýyna yńǵaıly bolǵany jón. 1 kitaptyń salmaǵy 1-4 synyptar úshin - 300 gramm, 6 synyptar úshin - 400 gramm, 7-12 synyp oqýshylary úshin 500-600 gramm bolýy kerek», - dep qorytyndylady ol.
