Omskide Qazaq mádenı ortalyǵy ashylady
ASTANA. QazAqparat - Qazaqstan Respýblıkasynyń Reseıdiń Omsk qalasyndaǵy konsýly Qonysbek Júsipbekov óńir basshysy Aleksandr Býrkovpen kezdesti, dep habarlaıdy QazAqparat QR-dyń RF-daǵy Elshiligine silteme jasap.
Atap ótilgendeı, taraptar Qazaqstan men Omks oblysynyń óńirleri arasynda mádenı jáne ekonomıkalyq baılanystardy damytý jáne yqpaldastyqty nyǵaıtý máselelerin talqylady.
QR konsýly Aleksandr Býrkovty saılaýdaǵy senimdi jeńisimen quttyqtap, qazaqstandyq jáne reseılik óńirlerdiń shekaralyq baılanysy odan ári damı beretinine senim bildirdi.
«Omsk oblysynyń aýmaǵynda 85 myń qazaq turady. Biz olarmen udaıy baılanystamyz. Konsýldyqta azamattardy qabyldaý úshin barlyq jaǵdaı jasalǵan. Bilim berý jáne mádenı is-sharalardy uıymdastyrýda qolǵabys etemiz», - dedi Qonysbek Júsipbekov.
Dıplomat sondaı-aq qazaq dıasporasy atynan Omskide Qazaq mádenı ortalyǵyn ashý usynysyn jasady. Q.Júsipbekovtyń aıtýynsha, ol jerde Qazaqstannyń shyǵarmashylyq ujymdary kontsertter qoıyp, kórmeler men kitaphanalardyń jumys isteýine múmkindik bolar edi.
Óz kezeginde Aleksandr Býrkov usynysqa qoldaý bildirip, Omsk merine ortalyq úshin ǵımaratty tańdaý tapsyrmasy beriletinin jetkizdi.
Kezdesý barysynda sonymen qatar Omsk oblysy men Qazaqstan Respýblıkasy arasynda bıznes-baılanystardy keńeıtýge qyzyǵýshylyq bildirildi. Budan bólek, Omskide Qazaqstan óńirleriniń kásiporyndary men bıznes-qaýymdastyqtary úshin forým ótkizý múmkindigi talqylandy.
