Ómirlik tájirıbeme súıenip tańdaý jasadym — Eńbek Eri
KÓKShETAÝ. KAZINFORM — Búgin elimizde AES qurylysy boıynsha jalpyulttyq referendým ótip jatyr. Kókshetaý qalasy turǵyndary saıası naýqannan shet qalmaı, belsendi qatysyp jatyr.
Elimizdiń keleshegi úshin tańdaý jasaǵandardyń qatarynda Sotsıalıstik Eńbek Eri Esilbaı Qadyralın de bar.
Sonaý jetpisinshi, sekseninshi jyldary dańqy jer jaryp turǵan dıqan, búginde Aqmola oblysynyń qadirli aqsaqaly Kókshetaý qalasynda ózi tirkelgen № 22 referendým ýchaskesine baryp, daýys berdi.
«Elimizdiń azamaty retinde saıası naýqannan shet qalmaı, azamattyq boryshymdy ótep, daýys berdim. Ómirlik tájirıbeme súıenip, durys tańdaý jasadym dep oılaımyn. Menińshe, árkim óz qalaýynsha, ishki túısigine senip, daýys berýi tıis. Óıtkeni, osy referendýmde keleshek urpaǵymyzdyń taǵdyry, ál-aýqaty úshin mańyzdy tańdaý jasalady», — dedi Kazinform tilshisine aqsaqal.
Kókshetaý qalasyndaǵy № 22 referendým ýchaskesiniń tóraıymy Rımma Baımaǵambetovanyń málimetinshe, atalmysh daýys berý ýchaskesinde barlyǵy 1776 daýys berýshi tirkelgen.
Saǵat 09:30 derek boıynsha barlyǵy 91 adam daýys berip úlgergen.
Aıta ketsek, budan buryn Aqmola oblysynda referendým qalaı ótip jatqanyn jazǵan edik.