Ómirden ótken 19 jastaǵy fýtbolshy emhanaǵa qandaı kúıde jetkizilgen
ALMATY. KAZINFORM – Almaty qalasynyń qoǵamdyq densaýlyq saqtaý basqarmasy «Han-Táńiri» komandasynyń 19 jastaǵy fýtbolshysy Dıas Tóleýdiń aýrýhanaǵa qandaı jaǵdaıda jetkizilgenin habarlady.
Ol Qazaqstan chempıonatynyń Birinshi lıgasy aıasyndaǵy oıyn kezinde ózin nashar sezinip, qyzmetkerler ony alańnan kóterip alyp ketken. Vedomstvo málimetinshe, fýtbolshy klınıkalyq ólim jaǵdaıynda aýrýhanaǵa jetkizilgen.
- Almaty qalalyq ortalyq klınıkalyq aýrýhanasynyń qabyldaý bólimine 2006 jyly týǵan patsıent klınıkalyq ólim jaǵdaıynda jetkizildi. Ony match kezinde kezekshilikte bolǵan jeke medıtsınalyq jedel járdem kóligi alyp kelgen. Qabyldaý kezinde júrek soǵysy men qan qysymy bolmaǵan, qarashyqtary keńeıgen. Medıtsınalyq brıgada 30 mınýt boıy reanımatsııalyq sharalar júrgizgenimen, ómir belgilerin qalpyna keltirý múmkin bolmady. Bıologııalyq ólim tirkeldi, — dep habarlady qoǵamdyq densaýlyq saqtaý basqarmasy.
Qazir oıynshynyń denesi ólimniń naqty sebebin anyqtaý úshin sot-medıtsınalyq saraptamaǵa jiberildi.
Eske salaıyq, keshe «Han-Táńiri» klýbynyń shabýylshysy kóz jumdy.
Ol «Qaırat» akademııasynyń túlegi bolǵan.