Ómir osyndaılarmen qyzyq: Jánibek domınıkanalyq boksshynyń málimdesine jaýap berdi
ASTANA. KAZINFORM – Qazaqstandyq boksshy, orta salmaqta WBO nusqasy boıynsha álem chempıony Jánibek Álimhanuly domınıkanalyq bylǵary qolǵap sheberi Karlos Adamestiń málimdesine áleýmettik jelidegi paraqshasynda jaýap berdi. Bul týraly Sports.kz jazdy.
Domınıkanalyq sportshy Inside The Ring YouTube arnasyna bergen suhbatynda Álimhanulymen jekpe-jek ótkizgisi keletinin jáne onyń taıaý ýaqytta uıymdastyrylǵanyn qalaıtynyn atap ótken edi.
Qazirgi ýaqytta Qazaqstanda júrgen Jánibek Karlostyń bul málimdemesin ázil áńgime retinde qabyldap, buryn onymen jekpe-jek týraly kelisimge kele almaǵanyn eske aldy.
– Anaý Adames qoımaıdy eken, ıá (kúlip). Biz Amerıkaǵa barsaq qashady, al Qazaqstanda júrsek qaıta jekpe-jekke shaqyrypty. Ózi bir túsiniksiz bala eken. Kúńkili bitpeıdi áıteýir. Biraq ómir osyndaı adamdarmen qyzyq qoı. Arasynda osylaı sóılep, kóńildi kóterip qoıady. Jaraısyń Adames, - dedi Jánibek Álimhanuly.
Eske sala keteıik, buǵan deıin Jánibektiń dopıng synamasynan tyıym salynǵan zat tabylǵanyn habarlaǵan edik. Keıin qazaqstandyq boksshynyń dopıng testten ótpeı qalýyna baılanysty 7 jeltoqsanǵa josparlanǵan kýbalyq Erıslandı Laramen jekpe-jegi ótpeı qaldy. Sondaı-aq Jánibek Álimhanuly resmı túrde álem chempıony tıtýlynan aıyryldy.
