Ómir men úmit arasy: Neırohırýrgtiń kásibı sheberligi men adamgershilik mıssııasy
ASTANA. KAZINFORM - Astanadaǵy Ulttyq neırohırýrgııa ortalyǵynyń qabyrǵasynda kún saıyn adam ómiri úshin kúres júrip jatady. Kásibı mamandardyń biri - Mı patologııasy neırohırýrgııasy bóliminiń meńgerýshisi, neırohırýrg Nurjan Ryskeldıev. Ol – óz isiniń naǵyz sheberi, talaı adamnyń ómirin saqtap qalǵan bilikti maman.
Dárigerlik jolǵa bala kezden daıyndalǵan. Mektep oqýshysy bolyp júrgeninde anasy ulynyń aq halatty abzal jan bolǵanyn armandaǵan eken. Ana úmiti aqtaldy. Nurjan Ryskeldıev elimizdegi bilikti neırohırýrgterdiń birine aınaldy.
Ol – bas mıynyń kúrdeli patologııalaryna ota jasaýǵa mamandanǵan joǵary sanatty dáriger. Ásirese, iri isikterdi alyp tastaý sııaqty óte kúrdeli operatsııalardy sátti júrgizip júr. Praktıkasynda mundaı dıagnoz qoıylǵan júkti áıelderge de talaı ret ota jasap, ana men balanyń ómirin saqtap qalǵan jaǵdaılar bolǵan.
Dáriger úshin eń zor qýanysh – otadan keıin óz aıaǵymen turyp ketken naýqastyń otbasyna, balalary men nemerelerine aman-esen oralýy. Mundaı sátter dárigerge erekshe jiger men shabyt beredi.
Jýyrda dárigerdiń qabyldaýyna Almaty qalasynan burynǵy patsıenti keldi. Osydan eki jyl buryn ol júktiliktiń 28-aptasynda shuǵyl túrde qaralǵan bolatyn. Naýqasqa qoıylǵan dıagnoz — mıdyń sol jaq mańdaı-samaı-tóbe bóliginde ornalasqan úlken isik edi.
Sol kezde ómir men ólim tarazyǵa túsken sátte neırohırýrg mıkrohırýrgııalyq ádispen sátti ota jasap, isikti alyp tastady. Nátıjesinde, anasy da, qursaǵyndaǵy sábıi de aman qaldy. Qazir ol balanyń jasy ekige jaqyn, ekeýiniń de jaǵdaıy jaqsy.
Nurjan Ryskeldıev – tek bilikti neırohırýrg qana emes, ár naýqastyń jaǵdaıyn júregimen túsinetin jan. Ol úshin dáriger mamandyǵy – jaı ǵana jumys emes, adamdarǵa ómir men úmit syılaıtyn qasıetti mindet.
Aıta ketsek, 13 maýsym kúni Memleket basshysy Qasym-Jomart Toqaev alǵash ret dárigerlermen Aqordada kezdesti. Medıtsına qyzmetkeri kúnimen quttyqtap, bul jıynnyń mán-maǵynasy erekshe ekenin atap ótti.