Ómir boıyna sottalǵan Sherhan Aımahannyń úkimin apellıatsııa ózgerissiz qaldyrdy
ShYMKENT. KAZINFORM — Shymkentte 21 jastaǵy Nuraı Serikbaıdyń ólimine baılanysty sottalǵan Sherhan Aımahannyń úkimi apellıatsııalyq satyda ózgerissiz qaldyryldy.
Shymkent qalasynyń qylmystyq ister jónindegi mamandandyrylǵan aýdanaralyq sotynyń 2026 jylǵy 13 tamyzdaǵy úkimine jábirlenýshilerdiń ókilderi Omarov pen Ahmetov, sondaı-aq advokattar Qurmanbaev pen Ábdıev apellıatsııalyq shaǵym bergen.
Іsti apellıatsııalyq tártippen qaraǵan sot alqasyna Báıdibek Dúısebekov tóraǵalyq etti.
Sot alqasy QR Qylmystyq-protsestik kodeksiniń 431-baby birinshi bóliginiń 1) tarmaǵyn, 443 jáne 444 baptaryn basshylyqqa ala otyryp, birinshi satydaǵy sottyń úkimin ózgerissiz qaldyrý týraly qaýly shyǵardy. Apellıatsııalyq shaǵymdar qanaǵattandyrýsyz qaldyryldy.
Sonymen qatar sot úkiminiń qarar bóligindegi jaza taǵaıyndaýǵa qatysty bóligi naqtylandy.
— «Qazaqstan Respýblıkasy Qylmystyq kodeksiniń 58-babynyń 4-bóliginiń talaptary negizinde jazalardy tolyq qosý arqyly Aımahanǵa túpkilikti ómir boıyna bas bostandyǵynan aıyrý jazasy taǵaıyndalsyn» degen sózder «Qazaqstan Respýblıkasy Qylmystyq kodeksiniń 58-babynyń 4-bóligine sáıkes qylmystardyń jıyntyǵy boıynsha Aımahanǵa túpkilikti ómir boıyna bas bostandyǵynan aıyrý jazasy taǵaıyndalsyn» degen sózdermen aýystyrylsyn, — dedi sot alqasynyń tóraǵasy Báıdibek Dúısebekov.
Sot qaýlysy jarııalanǵan kúninen bastap zańdy kúshine enedi. Narazy jaq qaýly jarııa etilgen kúnnen bastap sottalǵan adamnyń jaǵdaıyn nasharlatatyn negizder boıynsha bir jyl ishinde, al ózge negizder boıynsha merzimi shektelmeı kassatsııalyq shaǵym nemese narazylyq berýge quqyly.
Eske salaıyq, stýdent Nuraı Serikbaı 2026 jylǵy 11 qańtarda Shymkentte qaza tapty. Sot anyqtaǵandaı, Sherhan Aımahan qyzdy úıiniń mańynda kútip turyp, oǵan pyshaqpen 35 ret jaraqat salǵan.
Tergeý málimetterine sáıkes, kisi óltirýge deıin Nuraıdy uzaq ýaqyt boıy ańdyǵan. Qaıǵyly oqıǵadan birneshe aı buryn Aımahan qyzdy Almatydan Shymkentke kúsh qoldanyp alyp ketip, májbúrli túrde nekege turǵyzbaq bolǵan.
Oqıǵa ornyna kelgen polıtsııa qyzmetkerleri Sherhan Aımahandy adam urlaǵany úshin jaýapkershilikke tartpaǵan. Keıin sot-psıhologııalyq saraptama Nuraıdyń beınetúsirilimdegi túsiniktemesine kúmán keltirgen.
Іshki ister mınıstrligi Nuraıdyń otbasynyń ótinishimen buryn jumys istegen Shymkent polıtsııa qyzmetkerleriniń yqtımal qyzmettik salǵyrttyǵy faktisi boıynsha jeke qylmystyq is qozǵaǵan.
Shymkent qalasy polıtsııa departamentiniń bastyǵy men onyń birinshi orynbasary qyzmetterinen bosatyldy, birneshe qyzmetker ishki ister organdarynan jumystan shyǵaryldy.
13 tamyzda Shymkent qalasynyń qylmystyq ister jónindegi mamandandyrylǵan aýdanaralyq soty Sherhan Aımahandy Nuraı Serikbaıdy óltirgeni, nekege turýǵa májbúrlegeni jáne ańdyǵany úshin ómir boıyna bas bostandyǵynan aıyrýǵa úkim shyǵardy.
Birinshi satydaǵy sottyń úkimi zańdy kúshine áli engen joq. Taraptardyń ony 15 táýlik ishinde apellıatsııalyq tártippen shaǵymdanýǵa quqyǵy bolǵan.
Úkim jarııalanǵannan keıin Aımahannyń qorǵaýshylary sot sheshimimen tolyq kelispeıtinderin málimdegen. Sol kezde advokattar úkimniń tolyq mátinin alyp, zerttegennen keıin apellıatsııalyq shaǵym berý máselesin sheshetinderin aıtqan.
Sherhan Aımahannyń qorǵaýshylary ómir boıyna bas bostandyǵynan aıyrý týraly sot úkimine apellıatsııalyq shaǵym túsirdi.
Nuraı Serikbaıdyń otbasy ókilderi apellıatsııalyq shaǵymǵa qatysty óz ýájderin usyndy.
