Ómir boıyna kólik júrgizý quqyǵynan aırylǵan túrkistandyq mas kúıde ustaldy
TÚRKІSTAN. KAZINFORM – Túrkistan qalasynda motokólikti mas kúıinde tizgindegen 45 jastaǵy jergilikti turǵyn ustaldy.
Oqıǵa Qyzylorda tas joly boıynda bolǵan. Patrýldik polıtsııa qyzmetkerleri jol qaýipsizdigin baqylaý kezinde motokólikti toqtatyp, tekserý júrgizgen.
– Tekserý barysynda júrgizýshiniń kólik júrgizý quqyǵynan ómir boıyna aıyrylǵany anyqtaldy. Sonymen qatar medıtsınalyq kýálandyrý qorytyndysyna sáıkes, onyń kólikti qaıtadan mas kúıinde júrgizgeni belgili boldy, – delingen oblystyq polıtsııa departamentiniń málimetinde.
Atalǵan azamattyń áreketine qatysty Qylmystyq kodekstiń 346-baby 1-bóligi boıynsha is qozǵalyp, zańnamaǵa sáıkes tıisti sharalar qabyldandy.
Buǵan deıin Túrkistan qalasynda jol erejesin buzǵan 100-ge jýyq elektrli kólik aıyp turaǵyna qoıylǵanyn habarlaǵan edik.
